Dantza eta festa Legazpin, Sustraiak taldearen konpartsarekin
Konpartsaren 35. urteurrena ospatzeko, Legazpiko dantzariek herrira ekarritako dantzak eta pertsonaiak bildu dituzte. Goizeko festak arratsaldean ere izango du jarraipena.
Sustraiak taldeko kideak Laubiden, gaur goizean. Musika eta dantza izan dira protagonista Legazpin gaur goizean. Sustraiak dantza taldearen inauteri konpartsak 35 urte betetzen ditu aurten, eta hori ospatzeko, edizio guzti horietan Legazpiko dantzariek herrira ekarritako dantzak eta pertsonaiak bildu dituzte gaurkoan. Dantzariak 11:00etan Laubiden elkartu dira, azkeneko entsaioa egiteko; ondoren, 12:00ak aldera, kaleetan barrena abiatu dira Trapalata txarangak lagunduta. Hegialde (Laubide), San Inazio, Juanastegi, Bikuña Enea eta Plazaola auzoak igaro dituzte.
Konpartsa lehen aldiz 1991ean kaleratu zen, ikastaroetan zebilen jendeari dantza egiteko aukera emateko helburuarekin. Ordutik, jende asko igaro da bertatik, eta gaurkoan ere, haur, gazte zein heldu ugari bildu dira jaiaren bueltan. Euskal Herri osoko inauteri dantzak dantzatu dituzte: Zazpi Jauziak, Hegi eta Ostalersak (Luzaide eta Behenafarroakoa), Gabota (Zuberoa), Lantzeko Zortzikoa (Lantz), Makil jokoak (Lapurdi-Zuberoa), Kontradantza (Lapurdi), Aitarena (Andoain eta Aduna) eta Fandango eta arin-arina (Euskal Herria).
Goizeko ekintzez gain, festak arratsaldean ere izango du jarraipena. Bazkariaren ostean, 17:30ean hasiko da arratsaldeko saioa. Oraingoan, Gernika Plaza, Kale Zaharra (Karibe Zaharra parean), Kale Nagusia (Karibe Berri eta Gurrutxaga parean) eta Euskal Herria plaza igaroko dituzte. Azkenik, Lintxen agurra, panpina erretzea eta inauterien amaiera egingo dituzte.
