Abizenak euskaratzeko kanpaina hasi dute Itsasondon
Uema hainbat herritan ari da abizenak euskaratzeko kanpainarekin.
Uemak abizenak euskalduntzeko kanpaina hasi du hainbat herritan.Uema Udalerri euskaldunen mankomunitatea, Uema, abizenak euskalduntzeko kanpaina egiten ari da Tolosaldeko hainbat herritan, eta Itsasondok ere bat egin du agiri ofizialetan erdal grafian idatzita dauden abizenak euskaratzeko kanpainarekin.
Erregistro Zibilean egin behar da aldaketa, eta Itsasondoko Udalak bidea erraztuko du. Ondorengo dokumentuak behar dira prozesurako: Nortasun Agiriaren fotokopia, jaiotza ziurtagiria, errolda agiria, eta seme-alabak izanez gero familia liburua.
Dokumentu horiekin guztiekin Itsasondoko udaletxean dagoen bake epaitegira joan behar da ondorengo ordutegi honetan: asteartetan 09:00etatik 14:00etara eta ostiraletan 09:00etatik 11:00etara.
Zalantzak argitzeko ondorengo ohar hauek ere jakinarazi ditu Itsasondoko udalak.
Abizena nahi dudan moduan idatzi dezaket?
Epailearen irizpidea da. Normalean Euskaltzaindiaren irizpidea jarraitzen da. Euskaltzaindiaren liburuan Muxika agertzen da baina zenbait kasutan (Muxika, Mujika…) forma desberdinak onartu izan dira. Hala ere, abizen-aldaketa gisa izapidetu daiteke aldaketa eta, kasu horretan, Erregistroen eta Notarioen Zuzendaritza Nagusiak erabakitzen du aldaketa onartuz edo ezetsiz.
Gurasoena aldatuta seme-alabena zuzenean aldatzen al da?
18 urtez azpikoetan bai. 18 urtez gorakoetan, Erregistrora joan eta adierazi egin behar dute beraiek ere aldatu nahi dutela baina ez dute tramitazio guztia egin behar.
Anai-arreba guztiek aldatu behar dute nahita ez?
18 urtez azpikoek bai. 18 urtez gorakoetan bakoitzak erabakitzen du.
Behin aldatuta, zer pauso jarraitu behar dira? Non islatzen da aldaketa?
Epaitegiak, ofizioz, honako tokietara bidaltzen du: Udalera, Hauteskunde Zentsura, Poliziaren eta Guardia Zibilaren Zuzendaritza Nagusira… Hala ere, gero NANa berritzeko txanda hartu eta gero “hitzez hitzeko jaiotza agiria” eskatu behar da dagokion erregistro edo epaitegian. Eskaera egiterakoan NANa berritzeko dela esan behar da, epaitegiak horretarako bakarrik balio duen agiria eman ahal izateko.
Eskatzaileak lehengo grafiarekin dauzkan agiri guztiak berriz egin behar dira? Adibi. Unibertsitateko tituluak…
Jaiotza, ezkontza eta seme-alaben jaiotza-agirietan aldaketa epaitegietan bertan bideratzen da, ofizioz, jaraunsletza edo herentzietan arazorik ez izateko. Gainontzeko kasuetan bakoitzak ikusi behar du. Berez, gomendagarria da ahal den toki eta agiri gehienetan aldaketa egitea.
Gazteleraz diren abizenak aldatu daitezke euskal grafiara?
Epailearen baitan geratzen da. Lehen esandako moduan, printzipioz, euskal abizenen kasuan, Euskaltzaindiaren “Deitura-izendegia” jarraitzen da. Bertan honakoa adierazten da: “Euskal deituratzat, edozein hizkuntz jatorritakoa izanda ere, Euskal Herrian sustraitu dena jo da, nahiz esku artean duzuen lehen liburuki honetan euskal jatorrikoak ez diren gehienak agertzen ez diren.” Zalantza kasuan, onena Euskaltzaindiari galdetzea da. Edozein kasutan, lehen esandakoa, epailearen baitan geratzen da erabakia.
