Eltziegokoek urteko bisita egin dute Idiazabalera
Arabar Errioxako herri horretako talde batek egunpasa egingo du, gaur. Goizean iritsi dira, eta lagunarteko harremanak estutuko dituzte.
Idiazabalgo eta Eltziegoko lagunak, gaurko topaketa-egunari hasiera emateko taldeko argazkian, udaletxe aurreko eskaileretan. Aimar Maiz Idiazabal eta Eltziego, Goierriko eta Arabar Errioxako bi udalerrien arteko loturak estutzeko eguna dute, gaur. Goizean goiz, autobuskada bat eltziegoar iritsi dira Idiazabalera, urteko bisita egiteko. Iñaki Alberdi alkateak eta hainbat udal ordezkarik egin diete harrera, eta eguraldi umelari aurre egiteko, gosaltzera joan dira. Eguerdian, dantza emanaldiak egin dituzte bi herrietako lagunek, eta lagunarteko bazkaria ere izango dute.
Hamar-bat urte badira Eltziego eta Idiazabal senidetu edo elkarren arteko hartu-emanetan hasi zirenetik. Aurretik Laguardiarekin izan zuten harremana, eta hura eten ondoren, hegoalderago dagoen herri mugakidearekin josi zuten haria. “Gu urtero joan ohi gara Eltziegora, azaroan. Txekorra erre ohi dugu, eta herritarrei ematen diegu jateko”, azaldu du Iñaki Alberdi alkateak.
Gaur, aurtengo tratuaren ‘joaneko’ jardunaldia da. Eltziego aldean ohikoak diren jakiak prestatu dituzte bazkaltzeko: patatak errioxar erara eta haragi gisatua. Lagunarteko giroan eta aldartean jarraituko du topaketak.
Eltziegok 955 bizilagun ditu, eta Arabaren hego-hegoan dago kokatua, mugan.
Idiazabalgo eta Eltziegoko lagunak, gaurko topaketa-egunari hasiera emateko taldeko argazkian, udaletxe aurreko eskaileretan.Aimar Maiz
