500 eurotako saria Izazpiko Igoerako errekorra gainditzen duenarentzat
Maiatzaren 11n izango da aurten Izazpiko igoera, Ezkioko San Migel jaietako egitarauaren barruan.
Izazpira igoera probaren ondorengo podium-a, artxiboko irudian. Hitza Beste hainbatetan bezala, 1978. urtean Jose Antonio Aranzadi ezkiotarraren eta Joxe Aierbe ataundarraren artean egindako apustua izan zen Ezkiotik Izazpirako igoeraren iturburua. Gora-behera desberdinekin, lasterketak bizirik dirau 2016. urtean San Migeletako jai batzordekoek berreskuratu eta ondoren, EzkiOn MartxaN kirol klubekoekin elkarlanean segida eman ziotenetik. Aurten maiatzaren 11an «aro modernoko» IX.edizioa ospatuko da Argindegi ostatu parean hasi, Izazpiko puntara heldu eta berriz ere hasierako puntura heltzen den mendi lasterketa.
Proba bera bezala, lasterketa honen marka XX. mendekoa da, 1982.ean Pello Garin zizurkildarrak ezarritakoa; 31 minutu eta 26 segundo. 2017an Aritz Egea oso gertu egon zen, baina 18 segundo gehiago behar izan zituen probaren 6,3 kilometroak betetzeko. Errekor hori XXI. mendera ekartzeko erronkak, hortaz, indarrean jarraitzen du eta aurten ere 500 eurotako sari bat gordeta du antolakuntzak denbora hori hobetzea lortzen duenarentzat.
Horretarako, zabalik dago jadanik lasterketan parte hartzeko izen ematea 697 502 025 telefonoan edo kirolzale.eus web orrialdean. Errekorraz aparte, irabazlearentzat txapela eta 150 eurotako saria ere egongo da, podiuma osatzen dutenek ere izango dute trofeorik eta lehen ezkiotarrek ere izango dute saririk.
Lasterketa herrikoia
Baina sari eta markez harago, Ezkiotik Izazpirako igoera honen ezaugarririk nagusiena bere herri lasterketa izaera eta parte-hartzea da, horregatik umeen lasterketa bat ere egingo da proba nagusia baino ordu bete lehenago, hau da maiatzaren 11ko 10.30ean. Parte hartzaile nagusiei ordu horretan dortsalaz gain kamiseta bat emango zaie opari eta motxila bat izango da animatzen diren gaztetxoentzat. Proban parte hartu ez, baina lasterketa lagundu nahi dutenentzat, elastiko eta motxila hauek Ezkioko Argindegi ostatuan daude salgai: kamisetak 8 euroan eta motxilak 4tan. Biak batera erosita, 10 euro ordaindu beharko dira.
