Senarrek larunbatean ekingo dio buruz buruko txapelketari Bilbon
Elordiren aurka neurtuko ditu indarrak Beñat Senar pilotari ataundarrak. Lehen aldiz arituko da maila nagusiko txapelketa batean titular modura.
Beñat Senar Apalategi, Ataungo pilotalekuan.Aimar Maiz Buruz Buruko Txapelketa jokatuko duten pilotarien zerrenda ezagutzera eman dute dagoeneko, eta tartean da Beñat Senar ataundarra, joan den larunbatean Tolosako Beotibarren Asier Agirreri 20-22 irabazi ondotik. Lehen aldiz arituko da maila nagusiko txapelketa batean, nahiz eta binakakoan ordezko izan zen hiru partidetan.
Azkeneko hiru ekitaldietako egiturari eta lehiaketa sistemari eutsi die aurtengoan ere, eta hamabi pilotarik jokatuko dute berriro, enpresa bakoitzetik sei: Aspeko Jokin Altuna, Javier Zabala, Joseba Ezkurdia, Aitor Elordi, Dario Gomez eta Peio Etxeberria; eta Baiko Pilotako Unai Laso, Iñaki Artola, Erik Jaka, Jon Ander Peña, Iker Larrazabal eta Beñat Senar. Azken biak eta Etxeberria dira berritasunak azken ekitaldiarekin alderatuta.
Ostiralean, hasiera
Asteburu honetan bertan jokatuko dituzte final-zortzirenetako kanporaketak: Ostiralean Ezkurdiak eta Larrazabalek jokatuko dute aurreneko partida Azkoitian; larunbatean, berriz, bi partida jokatuko dituzte: Elordi-Senarrek Bilbon, eta Dario-Peña II.ak Iruñean; eta igandean, azkenik, Jaka eta Peio Etxeberria dira jokatzekoak, Tolosan.
Final-zortzirenetako irabazleak final-laurdenetako ligaxkarako sailkatuko dira, eta bertan zain izango dituzte iaz finalerdiak jokatu zituzten lau pilotariak: Laso, Altuna III, Artola eta Zabala.
Final handia, Bilbon
Orotara, hiru jardunaldiko ligaxka jokatuko dute, eta hilabete inguru iraungo du: apirilaren 11tik maiatzaren 11ra bitarte. Maiatzaren 17an eta 18an jokatuko dituzte finalerdiak, Gasteizen eta Donostian -oraindik lekuak zehazteke dauden arren-. Irabazleek, hala, finala jokatuko dute bi aste geroago, ekainaren 1ean, Bilbon. Tartean dagoen igandean, maiatzaren 25ean, hirugarren eta laugarren posturako norgehiagoka jokatuko dute, Donostian.
Buruz Buruko Txapelketako jaialdietarako sarrerak entradasfronton atarian eskuratu daitezke jadanik.
