X. Legoreggaen, "700 arima elkarrekin dantzan"
Legorretako reggae musika jaialdiak X. Legoreggaeren balorazioa egin du.
Larunbateko X. Legoreggae musika jaialdia.Legoreggae. Larunbatean, Legorretan egin zen hamargarren Legoreggae musika jaialdiaren balorazioa egin dute antolatzaileek:
“Ezin dugu hitzez deskribatu larunbatean sentitutakoa, a ze aje emozionala! Hasieratik genekien X. edizioa berezia izango zela eta, hori horrela izateko, lan handia egin dugu. Ez dakizue zenbat betetzen gaituen Legoreggae jaialdiak merezi zuen urteurrena jaso duela ikusi eta sentitzeak.
Larunbatean giro itzela izan genuen. Aretoa bete genuen. 700 arima elkarrekin dantzan, elkarrekin gozatzen. Energiaz beteriko jaialdia izan zen eta, energia honek, izugarrizko indarra ematen digu Legoreggaeren sua bizirik mantentzen jarraitzeko.
Eskerrak eman nahi dizkizuegu bihotzez. Zuei, ikusleei, jaialdian giro bizi zein paketsua sortzeagatik. Boluntario eta herritar guztiei, zuen laguntzarik gabe jaialdia ez zelako gauzatuko. Gure Revolutionary Brothers anaiei, hamar urte hauetan bidelagun izateagatik. Basabe garagardoak gure gorputzak energiaz betetzeagatik. Ederson audiobisualak jaialdian izugarrizko kalitateaz gozatzeko aukera emateagatik. Ordiziarrock beti gure ondoan laguntzeko prest egoteagatik. Eta, nola ez, oholtzari sua eman zenioten guztiei Mara, Erreuginak, King Konsul, Eira, Luama, Skaregekasko, Protoje, Tippi, Bad Sound System eta Aixiba. Zoratzen utzi gintuzuen, ikaragarriak zarete!
Herri txiki batean, lagun talde txiki batek sortutako zorokeriak jarrai dezala handiago bihurtzen!”.
