CCOO sindikatuak pasa den asteko “lan istripua” salatu du, Seiraken
Ormaiztegiko Seirak enpresako langile batek istripua izan zuen pasa den ostegunean lanean ari zen bitartean. “Beharrezko segurtasun neurriak betetzeko” eskatu diote enpresari.
CCOO sindikatuko ordezkariak eta militanteak, gaur, Ormaiztegiko Seirak lantegiaren aurrean egindako elkarretaratzean. Josune Zarandona Seirak enpresaren aurrealdean bildu dira gaur goizean CCOO sindikatuko hainbat ordezkari eta militante pasa den ostegunean, enpresan gertatu zen “lan istripua” salatzeko. Elkarretaratzea egin dute Ormaiztegiko lantegiaren aurrean 11:00etatik 11:30era. Arkaitz Antizar, CCOO sindikatuko Gipuzkoako lurralde arduradunak esan duenez, “Seirak enpresako CCOO sindikatuko ordezkaria” izan da istripua jasan duen langilea.
Salatu duetenez, istripua “beharrezko prebentzio neurriak bete ez zirelako” gertatu zen. Mozteko laser makina bateko balaztak huts egin zuen, “beharrezkoak diren mantenu lanak egiten ez direlako” ordezkari sindikalaren esanetan. Ondorioz, langilea zainketa intentsiboetako unitatean ingresatuta egon da asteburu osoan; nahiz eta dagoeneko alta jasota etxean dagoen.
Istripua “larritzat” jo du Antizarrek: “Langileak bost saihets eta orno bat ditu puskatuta, balaztak huts egin ondoren, jasotako kolpearen ondorioz”. Ondorio larriagorik ez gertatu izanaz “pozik” agertu da.
Ikerketaren emaitzaren zain
Seirak enpresako ordezkariek istripuaren inguruan, momentuz, ez dute adierazpenik egin. Ertzaintzak eta Osalanek istripuaren nondik norakoak aztertzeko ikerketa egin zuen gertaera jazotako tokian. Orain, ikerketa horren emaitzaren zain daude bai enpresa eta baita sindikatua ere.
Atizarrek adierazi duenez, orain, istripua jasan duen langilea errekuperatzea da lehentasunezko gaia. Gero, harekin biltzeko asmoa daukate, gertatu zenaren berri zehatzagoak jakiteko. Bien bitartean, enpresari lantegian “beharrezkoak diren prebentzio neurriak” ezartzeko eskatu diote eta “beharrezkoak diren inbertsioak” egitea horrelako istripu gehiago gertatu ez daitezen.
Hurrengo pausoak
Ordezkari sindikalarekin bildu eta gero, enpresako arduradunei gertatutakoaren txosten bat idatziz bidali eta bilera bat eskatuko dietela aurreratu du Antizarrek. “Espero dugu hemen berriz bildu beharrik ez izatea eta enpresa honetan segurtasun neurriak bete daitezela”, amaitu du CCOOeko ordezkariak.
