Kafe tertulia antolatu du Ataungo Altxa Buruak
Eskolako liburutegian elkartuko dira pantailen erabilerak dituen ondorioez hausnartzeko.
Kafe Tertulia antolatu du Ataungo Altxa Burua ekimenak biharko, apirilak 3, pantailen erabilerak dituen ondorioez hausnartzeko. 18:00etan elkartuko dira eskolako liburutegian, eta gaia «kezka iturri» hartuta, gurasoen arteko solasaldi bat egingo dute. «Nerabe eta guraso desberdinen hitzak aitzakia hartuta, gurasoen artean ideiak partekatuko ditugu, elkarrengandik ikasteko», adierazi dute antolatzaileek. Espazio seguru eta irekia sortzea da haien helburua, non gurasoek elkarrekin solastu, iritziak partekatu eta elkarri entzungo dioten, «inolako epairik gabe»: «Iritzi, esperientzia eta ikuspuntu desberdinak ezagutzeak gure pentsaera aberasten du eta egiteko moduetan onurak ekar ditzake». Dagoeneko itxi dute izena emateko epea.
