Haurren egunean, haurrak erdigunera
Haurren eguna ospatzen ari dira lazkaotarrak, eta haien gozamenerako irudimenez eta alaitasunez beteriko egitarau oparoa prestatu dute.
Frontoian egin dute eguerdiko bazkaria. Izaro Villarreal Haurren eguna ospatzen ari dira gaur Lazkaoko San Prudentzio jaietan. Etxeko txikiak dira gaurko protagonista, eta haien gozamenerako irudimenez eta alaitasunez beteriko egitarau oparoa dute prestatuta. Goizeko 11:00etan eman diote egunari hasiera, haurrentzako jolas parkea estreinatuta. Bertan puzgarriak, tailerrak eta bestelako jolasak izan dituzte erabilgarri eta goizean ez ezik, arratsaldean ere zabalik dago, 16:00etatik 18:30etara bitarte.
Hori baino lehenago, 14:00etan, euren bazkari propioa izan dute. Urtero haur eta gaztetxoenentzako une berezia izaten da hori, alegia, lagun artean otordu goxoa partekatzeko parada. Aurtengoan ere, eguraldia lagun, jende ugari bertaratu da eta frontoi-ingurua beteta ikusi da. Hartara, bazkalostean ere, festa giroak jarraipena izango du: 17:00etan, haurrek beren talentua erakusteko aukera izango dute ‘Play Back’ kantaldian, urtero arrakasta handia duen ekimena dena.
Iluntzean nabarmen segiko du jaiak, eta haur zein helduek izango dute zerekin gozatu. 19:00etan, bi ekitaldi nabarmen egingo dira aldi berean: batetik, esku pilota txapelketaren finala, non herriko pilotari gazteek final handian indarrak neurtuko dituzten; eta, bestetik, sardina jana eskainiko da plazan, festetako usadiozko ekitaldi gozo eta jendetsua.
Hori gutxi ez eta gauera arte luzatuko da egun osoko festa. 20:00etan, Oihan Vega Dj eta animatzaile euskaldun ezagunaren aurreneko kontzertua izango da, eta 22:30ean, berriz, beste saio bat eskainiko du amaiera borobila emateko. Bien bitartean, 22:00etan, zezensuzkoa iritsiko da Lazkaoko kaleetara, ohi moduan haurrak zirraraz beteko dituen ekitaldi ikusgarriarekin.
Kuadrillen eguna, bihar
Festei amaiera emateko, kuadrillen eguna ospatuko dute lazkaotarrek bihar, jaietako urteroko egun handienetakoa dena. Goizean goizetik kantuz eta dantzaz jantziko da Lazkao, eta erritmo bizi horrek gauera arte iraungo du.
