Boxeo jaialdi arrakastatsua
Sarrerak agortu ziren ostiralean. Borrokaldi nagusia Fran Mendozak irabazi zuen. Hiru goierritarrek galdu egin zituzten euren borrokaldiak.
Zelaia eta Guda (eskuinean).Euskobox. Arrakastatsua izan da beste behin ere, Ordiziako Boxing Ciclo elkarteak Beti Alai pilotalekuan antolatutako 74. Boxeo jaialdia. Sarrerak 16:30erako agortuta zeuden.
Emaitzei dagokienean, profesionaletan, Fran Mendozak Mauricio Vera mexikarrari irabazi zion (6 eraso 56 kiloetan).
Profesional berrietan, Erlantza Tejada bilbotarrak debutatu zuen. Amateur mailan bi aldiz Euskadiko txapelduna izana da. Jhonson Rosso dominikarra izan zuen aurkari. “Gerra bat izan da, kanpaiak jo duenetik aurrealdera joan gara kolpeak gurutzatzera, eskuin batekin iritsi eta ezkerreko crochet batekin amaitzea lortu dudan arte “, azaldu du Tejadak, harmailetako erreakzioarekin pozik. “Banekien zaleek asko ematen zutela, baina, hala ere, oso txundituta geratu naiz jendearen berotasunarekin, etxean borrokatzea bezala izan da. Espero dut ekitaldi honetan berriro parte hartu ahal izatea eta jendearen berotasuna gaur bezala sentitzea “, esan zuen boxeolari gazte bizkaitarrak.
Goierritarrek ezin izan irabazi
Aitor Guda beasaindarrak (Denis Zelaiaren aurka), Avigüey Parra beasaindarrak (Barrantes gasteiztarraren aurka) eta Israel Etxeberria ordiziarrak (Benaicharen aurka) ezin izan zituzten euren borrokaldiak irabazi.
Omenaldia
Omenaldirako tartea ere izan zen. Kerman Lejarraga bizkaitarrak, Europako welter eta superwelter txapeldunak Ordiziako Boxing Ziklo Klubaren, Ordiziako udalaren, Gipuzkoako Boxeo Federazioaren eta Euskoboxen maitasuna jaso zuen. Baina, batez ere, La Casillan edo Bizkaia Frontoian hainbestetan burrunbatu zen Kerman-Kerman!! oihua errepikatu zuen publikoarena.
