Urbieta arte plastikoen zentroak ireki du ikasturte berrirako izen-ematea
Balleta, marrazketa eta pintura, zeramika eta esmaltea, argazkigintza, antzerkia eta irratigintza ikastaroak izango dira.
Bear eskolako ikasle bat koadro bat pintatzen.Ariane Vierbücher Beasaingo Urbieta arte plastikoetako zentroak berriro ere ateak irekiko dizkie herritar guztiei sormenari eta arteari lotutako ikastaroetan parte hartzeko. 2025-2026 ikasturterako tailer eskaintza zabala prestatu dute hainbat elkarteren laguntzaz, eta izen-emate epea jada martxan dago.
Hiltegi zaharrean kokatutako zentro honek artearen inguruan ikasi eta adierazteko aukera emango die adin guztietako beasaindarrei. Aurten honako jarduerak eskainiko dira:
- Balleta: 4 urtetik gorakoentzat, haur zein helduentzat.
- Marrazketa eta pintura: Bear elkartearen eskutik, ordutegi malguekin eta adin-talde ezberdinetan.
- Zeramika eta esmaltea: Buztingintza elkarteak bi mailatan eskainiko ditu tailerrak. Izena irailaren 10a baino lehen eman behar da.
- Argazkilaritza: Argizpi elkarteak urrian emango ditu saioak, astelehen eta asteazkenetan.
- Antzerkia: 5 urtetik gorakoentzat, adinaren arabera antolatutako taldeetan.
- Irratizaleak: Goierriko Irratizale Elkarteak bazkide berriak gonbidatzen ditu irratiaren mundua ezagutzeko.
Tailer guztiak Urbieta zentroan bertan egingo dira, eta xehetasun gehiago eskuragarri daude etxe guztietara banatutako esku-orrian eta Beasaingo Udalaren webgunean.
Udalak herritarrak animatu ditu eskaintza honetaz baliatzera. “Ez galdu aukera zure sormena pizteko eta artearen bidez adierazteko”.
