Frontenisaren zaletuek hitzordu garrantzitsua dute larunbatean
Laugarren Frontenis Txapelketa jokatuko da Antzizarren. Hamasei bikotek parte hartuko dute egun osoko kirol hitzorduan. Irabazleentzat txapel bana eta bigarrenentzat kopak banatuko dituzte.
Iazko irabazleak.Antolakuntza Antzizar kiroldegiko pilotalekuan giro berezia biziko da larunbatean, hilak 22, egun osoko kirol jardunaldi handi bati esker. Herri mailako IV. Frontenis Txapelketa jokatuko da bertan, herriko kirol egutegian dagoeneko bere tokia irabazi duen hitzordua. Goizeko 08:30ean hasiko dira lehenengo partidak, eta azken puntuak arratsaldeko azken unera arte luzatuko dira, zale eta parte-hartzaileei eguneko kirol festa borobila eskainiz.
Antolakuntzako kide den Jon Etxezarretak gogoratu du txapelketa duela lau urte jaio zela, herrian bazegoelako frontenisarekiko zaletasun bizia: «Beasainen jende mordoxka bat aritzen gara frontenisean aspaldi-aspalditik; kuadrilla desberdinetako jendea gara, adin tarte desberdinekoak, neskak eta mutilak. Guk argi genuen kirol honek ere bere plaza merezi zuela». Ideia, gainera, bestelako txapelketa arrakastatsu batzuen ondoren etorri zen. Izan ere, Beasainen, aspalditik antolatzen dira kuadrillen arteko areto futbol txapelketa eta esku pilota eta pala txapelketak. «Guk ere herriko kirol eskaintza aberastu nahi genuen, eta horrela hasi ginen».
Lehen edizio hartan hemezortzi bikotek parte hartu zuten, eta ordutik parte hartzaile kopurua egonkortu egin da. Antolakuntzak hamasei bikoteko muga jarri zuen, jardunaldi bakarrean lehiaketa antolatzeko beharrak hala eskatuta. «Urtero geratzen da jendea kanpoan, jokatzeko gogoz. Horrek erakusten du zenbat hazi den zaletasuna», azaldu du Etxezarretak.
Izen ematea jada itxita dago eta frontoia prest lehiari hasiera emateko. Txapelketa egunean, frontenisaren erritmo bizia nagusituko da: bote azkarrak, hormaren kontra dardarka kolpatzen duten pilotak, jokalarien arteko konplizitatea… eta noski, ikusleen animoak, giroari berezko beroa ematen diotenak.
Saria ere ez da nolanahikoa izango: irabazleek txapel bana jasoko dute, eta bigarren sailkatuek kopa bana, kirol jardunaldiaren oroigarri. Baina sariez harago, antolakuntzak azpimarratu du txapelketaren benetako balioa dela herrian sortzen den komunitatearen indarra. Hala, azaroaren 22an, Beasain berriz ere frontenisaren erdigune izango da.
