Korrika Txikia abiatu da Goierrin [galeria]
Urretxuko eta Zumarragako ikasleak kalera atera dira Korrika Txikia egiteko. Urretxuko Goierriko plazatik irten dira Gainzuriko haurrak, eta Ipeñarrieta kalean hartu dute testigua Urretxu-Zumarragako ikasleek. La Salle-Legazpi ikastetxearen parean aldatu dute testigua eta, amaitzeko, guztiak elkartu dira Euskadi plazan. Haur hezkuntzako haurretatik hasita ehunka ikasle egin dute bat kaleetan, eta Korrika Txikiak herritarren artean ere ikusmina sortu du. Datozen egunotan Korrika Txikiak egingo dituzte Goierriko beste herrietan eta asteazkenean eta ostegunean igaroko da Goierritik 17. Korrika.
