Hainbat ekintza antolatu dituzte suteak Eixalen eragindako kalteak ordaintzeko.
Pasa den urriaren 19an Legazpiko Hegialde auzoko Egizabal baserria erre zen, ukuiluan piztutako sute baten ondorioz. Ezbehar horrek sortutako kalteei aurre egin asmoz, hainbat ekintza antolatu dituzte Legazpiko eragileek eta elkarteek, Udalaren babesaz.
Abenduaren 5ean, igandea, herri kirol jaialdia egingo dute, idizaleek antolatuta. Haztegi ikastolan ospatuko da desafioa eta bertan lau talde ariko dira: Asier Zubillaga, Gheorghe Cucuricci eta Joxe Ugarteburu; Julian Telleria, Iñaki Lakiola eta Angel Arrospide; Javier Arizti, Elias Zabaleta eta Xabier Zaldua eta Egoitz Armaolea, Javier Elorriaga eta Luis Lakiola. Harria bost aldiz altxatu beharko dute, 4 kana erdiko enbor moztu eta idiekin plazan ibili, guztia ere 30 minututan. 12:00etan hasiko dute dema.
Bestetik, Gazte Asanbladak
Ixal Rock jaialdia antolatu du, dirua biltzen laguntzeko. Abenduaren 11n ospatuko da hau, Legazpiko gaztetxean. Mother Ship, Sleepwolkerr, Eutsi, De-Pintxos, Ze Esatek! eta Skapando taldeek eskainiko dituzte kontzertuak, 20:00etan hasita. 5 euro ordaindu beharko da sarrera, berreraikitze lanetarako laguntza moduan.
Bertso jaialdia
Urtarrilaren 8an bestetik, bertso jaialdia egingo du Bertso Olariak bertso eskolak. Andoni Egaña, Maialen Lujanbio, Amets Arzallus, Julio Soto, Jon Maia eta Miren Amuriza ariko dira kantuan. 22:00etan hasiko dute saioa pilotalekuan eta sarrerak 10 euro ordaindu beharko dira aurrez erosita. Bestela, egunean bertan 12 euro ordaindu beharko dira sarreran. Karibe Zaharra, Katilu eta Laubide tabernetan, kultur etxean eta Ogi Berrin eros daitezke sarrerak.
Kontu korronte zenbaki bat ere ireki dute, herritarren laguntza ekonomikoa jasotzera bideratuta: 2101 0050 38 0127633139 (Kutxa).
Baserritarren elkartasuna
Hala ere, ez dira hauek izan Egizabal baserrikoek bizilagunen aldetik jasotako babes adierazpen bakarrak. Sutea gertatu eta ondorengo egunean, inguruetako baserritar ugari bertartu zen Eixalera, bakoitzak ondutako belarrez eginiko 40 fardo zeramatzala, suteak erretakoak ordezkatzeko eta negua igarotzen laguntzeko.
Egizabal baserriko sutea Gioerriko Hitzan [.pdf]
