Irrien Lagunak klubaren aterpetxea Zerainen dago
goierritHartxo 38 azala
Familientzat, taldeentzat eta ikastetxeentzat 2-3 eguneko egonaldiak eskaintzen dira
Zeraindarrek aspalditik daukate harremana Pirritx eta Porrotx pailazoekin. Urritik aurrera, harremana sakonagoa izango da. Goierrithartxok jakin duenez, Pirritx, Porrotx eta Marimotots pailazoek (Katxiporreta taldea), Berria egunkariak eta Elkar argitaletxeak sortu duten Irrien Lagunak klubak, Zeraingo aterpetxea, izango dute elkargune. Astean zehar, ikastetxeek eta asteburuetan familiek eta taldeek, Goierriren bihotzean, naturaz eta Zerain Paisaia Kulturalaz gozatzeko aukera izango da Irrien Lagunak Klubeko Largabista, Martinber eta Marikalanbre… pertsonaiekin. 44 pertsonentzako lolekua dago aterpetxean. Lolekua eta otorduak eskaintzeaz gain, ekintza ezberdinak ere eskainiko dituzte Irrien Lagunak aterpetxean. “2 eta 3 egunetako egonaldiak eskaintzen dira. Gai ezberdinak landuko dira, adinaren arabera: industrializazioa, uraren erabilera, egurraren eraldaketa, birziklapena, animaliak, udazkena, erdi aroa Segurari lotuta… . Irrien Lagunak Klubeko pertsonaiak azalduko dira bisitaldietan. Largabista adibidez, naturaren lotura duenez, han azalduko … Marikalanbre zientziarekin lotuta,… Martinbertso kulturarekin lotutako pertsona denez, Segurara joango gara…”, diote Zeraingo Turismo Bulegokoek. Zeraindarrak gustura daude elkarlan honekin eta era horretan, Pupu eta Loreren heziketan parte hartuko du Zerainek ere. Dagoeneko gainera, jendea animatzen hasi eta erreserba bat baino gehiago egina dauka hianbat ikastetxek. Irrien Lagunak aterpetxeko egonaldian parte hartu nahi izanez gero, 943801505 telefono zenbakira deitu edo turismobulegoa@zerain.com posta elektronikora bideratu behar da.
Zer da Irrien Lagunak kluba?
- Pirritxek bikiak izan ditu, Pupu eta Lore , eta orain pailazoak jaio berrien hezkuntzaz ere arduratu beharko dira.
- Sudur gorriei laguntzeko, Berria egunkariak, Elkar argitaletxeak eta Katxiporreta pailazo taldeak sortu duten kluba da Irrien Lagunak. Ateak zabalik ditu klubaren helburuekin bat egiten duten guztientzat.
- Euskal Herriko haurrak, gurasoak eta hezitzaileak bildu nahi dituen kluba da, Pupu eta Lore guztien artean hezteko. Ikuspegi hezitzailea izango du, beraz.
- Pupu eta Loreri, eta hauekin batera Euskal Herriko guztiei, koloretako mundua eraikitzen lagundu nahi klubak, hainbat balore sustatuz, beti ere euskara eta irria oinarri hartuta.
Zer sustatuko du klubak?
- Euskal Herrian pentsaera, kolore eta kultura ezberdinetako jendea bizi denez, aniztasuna balore bezala aldarrikatu nahi du klubak, besteak ezagutuz eta maitatuz gero aniztasuna aberatsa baita beti.
- Euskara: euskaratik eta euskaraz, euskal kulturako esparruak ezagutaraziko dizkie haurrei.
- Bizikidetzari buruzko kultura berritzailea sortzen lagundu nahi du, errespetuan eta elkarrizketan oinarrituta, oinarrizko baloreak sustatzeko: berdintasuna, errespetua, elkarrizketa, parekidetasuna, elkartasuna, eta askatasuna.
- Ekologia: natura babestea, iraunkortasuna bermatzea, baliabideak zentzumenez erabiltzea, kolore guztien artean berdea zein ederra eta garrantzitsua den ikusarazi nahi du.
