Larunbatetik aurrera Zirika irratia berriro martxan
Larunbat honetan ekingo dio ikasturte berriari Idiazabalgo Zirika irratiak. FM 98.9an entzun ahal izango da asteroko saioa 13:00etan hasita, eta gainerakoan 24 orduz musika egongo da. Aurrez zegoen lan taldeari, gainera, lagun berriak ere gehituko zaiz...
Larunbat honetan ekingo dio ikasturte berriari Idiazabalgo Zirika irratiak. FM 98.9an entzun ahal izango da asteroko saioa 13:00etan hasita, eta gainerakoan 24 orduz musika egongo da. Aurrez zegoen lan taldeari, gainera, lagun berriak ere gehituko zaizkio aurtengoan. Horiez gain, kolaborazioak egiten jarraituko dute Anttonio Berasategi irakasleak eta Jaione Munarriz metereologoak.
Eguerdiko magazin honetan atal ezberdinak daude. Herriko albiste berrienekin hasten dute saioa eta gero kirol tarteari ematen diote paso. Jarraian egunerokotasuna duten gaiak sakonago lantzen dituzte elkarrizketa edota erreportaje formatuan. Horrez gain, astero, Anttonio Berasategik herriko leku ezberdinak izaten ditu hizpide. Hemendik aurrera, gainera, Zirika irratia Internet bidez zuzen-zuzenean entzuteko aukera izango da www.zirikairratia.tk web orrialdean. Hau gutxi balitz, astero zozketak egingo dituzte entzuleen artean. Esatariek galdera bat egingo dute eta entzuleek erantzun egokia emanez gero, zozketan sartuko dira. Astero Zirika irratiko kamixeta bat egongo da jokoan. Noizean behin, bestelako sariak ere egongo dira. Iazko azken zozketan, esaterako, Korta itsaskitegian bi lagunentzako otordua zozkatu zen.
1989an sortu zen Zirika irratia. Orduz geroztik etenaldi bat egon bazen ere, 2010eko urte hasieran Idiazabalgo gazte talde batek irratiari hautsak kendu eta berriro ere lanean hasi ziren estudio berrian, frekuentzia berrian eta irudi berriarekin. Euren webgunean ere herriarekin lotutako albisteak sarri-sarri igotzen dituzte.
