Araman kultur astea ospatuko dute, ostiralean hasita
Kultur astea ospatuko dute Araman, etzi hasi eta hurrengo ostiralera bitarte. Astebete horretan, herri giroko ekitaldiak prestatu ditu udalaren Kultura Batzordeak. Aramarrentzat, Araman bertan gauzatzeko modukoak. Egitarau xumea herritarrek elkartzeko baliatu nahi dute, beste behin.
Aramako eskulan ikastaroetan ibilitako herritarrek sortutako artelanak ikusteko aukera izango da, batetik. Ostiralean 18:00etan zabalduko dute bilduma, udaletxe berriko Iriarte aretoan. Egun horretan 21:00ak arte egongo da zabalik.
Biharamunean, bigarren eskuko liburuen azoka atondu dute. Iriarte aretoan bertan jarriko dituzte mahaiak, 11:00etatik 13:00etara bitartean.
Herritik kanpora irteera bat izango da kultur astean. Igandean egingo dute, Ernio mendira. Iraileko igande guztietan bezala, erromeria izango da, Zelatungo zelaietan.Aramar talde bat oinez joango da Ernioraino, 07:00etan plazatik irtenda. Gainontzekoak kotxeetan joango dira, 09:00etan. Zelatunera arteko azkeneko bide zatia denek elkarrekin egingo dute.
Hurrengo asterako beste bi ekitaldi iragarri dituzte egitarauan. Ostegunean, irailaren 26an, pintxo lehiaketa egingo dute, Arrikutz elkartean. 18:30ean hasiko da, eta 20:30a aurretik aurkeztu beharko dira pintxoak. Ostiralean, azkenik, 18:30ean haurrentzat eta gazteentzat askaria, eta 19:30ean zinema emanaldia izango dira, Iriarte aretoan.
