Lehiaketa, kirol ekitaldia eta musika emanaldiz blai, Eskarabillako jaiak ospatuko dituzte asteburuan
Egitarau bete-betea prestatu dute Ordiziako Eskarabilla auzokoek asteburu honetarako. Ostiral gaueko hamarretan Itxaropena Elkartean egingo den mus txapelketa izango da jaietako lehen ekitaldia; hala ere, larunbat eguerdiko txupinazoak iragarriko du festen hasiera.
Buru-belarri aritu dira lanean hainbat bizilagun festa hauek antolatzen. Hamaika gastronomia, kultur eta kirol ekitaldi prestatu dituzte, adin eta gustu guztietarako. Larunbatean, behin txupinazoa botata, patata tortila lehiaketa, oin lasterketa, herri kirolak, haur danborrada zein mozorro festa izango dira. Gauean kontzertua Skalope eta El cerdo que grunge-rekin eta berbena Kaxianoren Alabak taldearekin. Igandean berriz, Mertxe Aizpuruaren eskutik ipuin kontaketa izango da eta herri bazkaria ondoren.
Antolatzaileek lanerako taldeetan izena emateko dei egin diete bizilagunei; Aldasoro tabernan dago apuntatzeko aukera. Bestalde, herri bazkarirako txartelak ostiralera arte egongo dira salgai Aldasoroz gain, El Pason tabernan eta Bege dendan.
