Legorretan herri baratzeetan ekoitzitako produktuen erakusketa eta dastaketa egingo dute
Legorretan duela bi urte jarri zituen abian herri baratzeak. Herritarrek sail bat hartu, eta etxerako barazkiak ateratzeko modua dute harrezkero. Zer lan egiten duten eta nolako uzta bildu duten erakusteko, udalak erakusketatxo bat antolatu du, larunbaterako (irailak 21). 18:30etik aurrera, baratze ekologikoetako produktuak ikusteko eta dastatzeko modua izango da, plazan. Sagardoa eta ardoa ere eskainiko dute. Herri lurretako baratzeez gain, Ugaro herri eskolakoek ekoitzitako produktuak ere jarriko dituzte. Argazki erakusketa ere atondu dute.
