Ordiziako Eskarabilla auzoan lehertu da festa
Eguerdiko 12:00etan punttuan bota dute Ordiziako Eskarabillako auzotarrek festaren iragarpenaren suziria. Burrunbazale txarangak, erraldoiak eta buruhandiak izango dira lehenengo orduko protagonistak. Patata-tortilla usaina berehala zabaldu da auzoan, eta auzotarrak festarako gogoz daudela argi geratu da.
Arratsaldean, 17:00etan, korrika lasterketa izango da eta ondoren, txokolate jana. Gaurko egitarau zabala daukate prestatuta auzotarrek. 18:00etan herri kirolak, 19:00etan, musika Burrunbazale txarangarekin, 20:00etan haur danborrada, 22:30ean umeentzako mozorro festa, 24:00etan mozorro gaua hasiko da Skalope, Elcerdo que Grunge eta Kaxianoaren alabarekin. Goizaldean, 06:00etan, Matutina egingo dute.
