Eloy Velasco epailearen aginduz, Guardia Zibilak Herrira! plataformaren aurkako operazioa egin du gaur, Hego Euskal Herriko lau probintzietan. Hainbat egoitza mihatu eta 18 lagun atxilotu dituzte, horietatik 15 Gipuzkoan. Egoitzak ixteaz gain, diru kontuak eta sare sozialetako kontuak blokeatzeko agindua ere eman du Velascok. Sarekada hori salatzeko, elkarretaratzeak deitu dute gaur iluntzerako, Beasainen, Ordizian, Itsasondon eta Zumarraga-Urretxun,
Bakearen bidean, utzi bakean EH. Atxilotuak lemapean.
- Itsasondon, 19:00etan, plazan.
- Beasain: 20:00etan, Bideluze plazan.
- Ordizia: 20:00etan, plaza nagusian.
- Urretxu-Zumarragan: 20:00etan, Areizaga-Kalebarren plazan.
Operazio zabala
Goizeko 10:30ean hasi da Guardia Zibilaren polizia operazioa. Hernani, Bilbo, Iruñea eta Gasteizko egoitzak mihatu eta itxiarazi dituzte, hainbat lagun atxilotzearekin batera. Hernanin, herrialde mailako bilera egiten ari ziren 10 lagunak atzeman dituzte. Gainontzeko zortzietatik 5 Gipuzkoan atxilotu dituzte, eta bana Bizkaian, Araban eta Nafarroan. Operazioa oraindik zabalik dagoela azaldu dute.
Hauek dira atxilotutako 18 lagunak: Jexux Mari Aldunberri, Jon Garai, Jose Antonio Fernandez, Nagore Garcia, Sergio Labaien, Manu Ugartemendia, Eneko Villegas, Roberto Noval, Ibon Meñika, Oscar Sanchez, Amaia Esnal, Eneko Ibarguren, Ekain Zubizarreta, Imanol Karrera, Fran Balda, Beñat Zarrabeitia, Ane Zelaia eta Gorka Gonzalez.
Jorge Fernandez Diaz Espainiako Barne ministroak azaldu duenez, Herrira! “ETAren tentakulua” da eta “bere egin ditu Amnistiaren Aldeko Mugimenduaren helburuak, egitura, funtzioak, metodoak, finantzaketa erak, ikonografia eta sare komunikatiboa”. Horrek “agerian” uzten du Herrira AAMren oinordekoa dela, Fernandez Diazen arabera.
