Bihar hasi eta igandera bitartean Asteburu Mikologikoa antolatu dute Legazpin Legazpiko Perretxikuzaleak taldeko kideek. Aurtengoa 20. edizioa izango da, herri mailan perretxikoen inguruko informazioa zabaltzeko helburuz egingo dutena.
Bihar eta etzi perretxiko bilketa egingo dute. Nahi duten herritarrek eta ingurukoek hartu dezakete parte. Norberak bere kontura bildu ditzake perretxikoak nahi duen lekuan, eta ondoren, goizean hasi eta eguerdira bitartean Lekanazpi elkartera eraman beharko dituzte bildutako aleak. Helburua perretxiko erakusketa zabal bat antolatzea da, eta hortaz, edozein perretxiko mota onartuko dute antolatzaileek.
Behin bilketa eginda etzi arratsaldean, 16:00etatik aurrera jasotako perretxiko guztien sailkapena egingo dute Aranzadi Zientzia Elkarteko adituen laguntzarekin. Igandean izango da perretxiko erakusketaren txanda. Goizeko 11:00etan irekiko dute Azokako arkupeetan. Erakusketara nahi duten herritar guztiak daude gonbidatuta, asmoa perretxiko moten arteko ezberdintasunak erakutsi eta onak eta txarrak zeintzuk diren bereizten jendeari erakustea baita. Bildutako kopuruak ahalbidetzen badu dastaketa ere egingo da.
