Itsasondoko eskolari Urkipe izena jarri diote, ludotekari Eguzkilore eta gaztelekuari Karreape
Itsasondon haurren zerbitzurako dauden lau guneek izen berezi bana badute. Itsasondo haurren herria ekimenaren barruan, haur eskola, eskola, ludoteka eta gaztelekua izen propioz identifikatzeko deialdia bukatu da.
Hala, haur eskolak eta herri eskolak izen bakarra eta bera edukiko dute: Urkipe. Ludotekari Eguzkilore izena eman diote, zerbitzua erabiltzen duten haurrek eurek hala erabakita. Eta gaztelekua Karreape izango da aurrerantzean, izenez.
Haurren zerbitzuak eta ekimenak jorratzeko sortu duten egitasmoaren barruan, lehenbiziko urratsa izenak jartzea zehaztu zuten, eta bete dute. Haurrek, herritarrek eta kanpokoek zerbitzu horiek izenez identifikatzea beharrezko jo, eta itsasondoarrei proposamenak bidaltzeko deialdia egin zieten. Guztira 36 izen proposatu dituzte, bederatzi lagunek emanak.
Epaimahaia haur eskolako hezitzaileek, eskolako irakasleek, udaleko susperatzaileak, jubilatu elkarteko kideek, guraso elkarteko bi partaidek eta gaztelekuko nerabeek osatu dute.
Hurrengo egitekoa, zerbitzu guztiak irudikatuko dituen logotipo bat aukeratzea izango da. Diseinua egiteko eskolako ikasleei eta gaztelekuko gaztetxoei eskatuko diete.
Gabonetarako jarduerak
Itsasondoko Udalaren Gazteria sailak haurrentzat eta nerabeentzat aisialdi programa antolatu du, Gabonetako oporretarako. Guraso Txokoan eta ludotekan egoten diren haurrek eta haien sendiek Familia giroan egitasmoa izango dute. Familiartean bezala beste familiekin ere harremanak sendotzea du helburu, jolas, joko eta irteeren bidez. Idiazabalgo Gaztaren Interpretazio Zentrora bisita egingo dute, Idiazabalera. Izena emateko azkeneko eguna gaur da, udaletxean. Gaztelekuan, berriz, urtarrilaren 3rako bazkaria eta mus txapelketa antolatu dituzte.
Gazteek eta haurrek bihar ekitaldi bana dute. Haurrentzat, Maite Arrese aktore beasaindarrak Ipuinondoa ipuin kontatze saioa egingo du, 17:00etan, ludotekan. Gazteek ligatze ikastaroa dute, ordu berean, gaztelekuan. Matxismo jarrerak ekiditeko azalpenak emango dizkiete.
