Olaberriko kultur asteak egitarau betea izango du gaur eta asteburuan
Olaberriko kultur asteak egitarauaren zati mardulena lau egunotan izango du. Atzo argazki bildumak Scrap teknikarekin sortzeko ikastaroa hasi ondoren, bihar 10:00etan edukiko du jarraipena. Taloak egiten ikasteko saioa ere egin zuten atzo, eta bihar 18:00etan probatu ahalko dira, talo festan, Arkupen.
Gaur, Pello Ramirez eta Xabier Zeberio musikarien emanaldia izango da, 18:30ean, Ihurre Zaharra kultur etxean. Euskal jantzi tradizionalak atontzeko ikastaroa ere gaurko zegoen iragarrita, baina martxoaren 15eko arratsaldera atzeratu dute.
Umeentzat Kulunkantauri ikuskizuna egingo dute bihar, 15:15ean. Munduan ezagunak diren jatorri izendapendun ardo zurien dastaketa ere egingo dute, Zezilioenean, bihar 19:30ean.
Etzi, Joxe Kerejetaren oroimeneko bola lehiaketa (10:00-11:30) eta zuhaitz eguna ospatuko dituzte (10:30). Igandean, jubilatuenean hamaiketakoa eta Jon Maiaren Riomundo izango dira.
