Beasainen udazkena kulturaz blai

Azaroaren 12ra arte kultur eskaintza zabala prestatu dute udalak eta herriko 19 elkarteek .Telefono mugikorreko ‘Beasain Kultura’ aplikazioa sortu dute.

Goierriko Hitza

Beasain

2016/09/26

Usurbe Antzokian aurkeztu dute Beasaingo Udazken Kulturala.

Udazkenarekin batera heldu da aurtengo Beasaingo Udazken Kulturala. Zortzi astez, 60 ekintza izango dira herriko txoko desberdinetan. Adin guztiei zuzendutako jarduerak dira; arte adierazpen ugarikoak: antzerkia, musika, bertsolaritza, bisita gidatuak, pintura… Elkarlanaren erakusleihoa izango da berriro ere udazken kulturala; udalarekin batera, herriko hemeretzi elkartek osatu baitute kultur eskaintza. Aizkorri mendi elkartea, Argizpi argazki elkartea, Arrano elkartea, Asmube, Aurtzaka eta Ostadar dantza taldeak, Suhar arkeologia taldea, Kantu Jira, Loinatz abesbatza, Irriargi elkartea, Goizeresi txistulari taldea, odolki kofradia, Aranealde elkartea, Lemniskata zientzia elkartea, Hijos de Martin y de Loinaz antzerki taldea, Txilibutxof, Jazpana elkartea, eta Ekaitz erraldoi eta buruhandi konpartsa taldeen urteko lanaren erakusleihoa izango da udazken kulturala. Hip Hip Urri Aurten bi egitasmo gehiago barneratu dituzte gainera: Hip Hip Urri, familiei zuzendutako kultur eskaintza. Europatik ekarritako programa da Hip Hip Urri. «Urria umeen hilabetea izaten da Europan. Familian, kultura kontsumitzeko modu bat da», zehaztu du Xabier Matarranz zinegotziak aurkezpenean. Era berean, Europako beste programa bati jarraituz, Ondarearen Europako Jardunaldien barruan, ekitaldi ugari antolatu dituzte, migrazioaren eta ondarea gai hartuta. Lehenengoa, igandean izango da, 10:00etan, Josetxo Zufiaurreren eskutik. Bi aurre estreinaldi Usurbe Antzokian bestetik, bi aurre estreinaldi izango dira datozen asteetan. Lehenengoa, urriaren 12an La Sexta telebista kateko Salvados programaren Astral dokumentala; eta bigarrena, urriaren 22an, ETBko Go!azen 3.0 gazteen telesaila. Telefonorako aplikazioa Aurten Udazken kulturalak badu berrikuntza bat, ACV multimedia enpresak sortua: udazkeneko kultur agenda osoa telefono mugikorrerako sortu duten App Beasain Kultura aplikazioan. Egunez egun edo gaika sailkatuta aurki daitezke udazken kulturaleko ekintzei buruzko informazio zehatza eta eguneratua.

Azken elkarrizketak

Azken bideoak

Argitalpen bereziak