Xabier Urteaga eta Unai Goikoetxea dira Beasaingo pilota txapeldun berriak
22 eta 9 irabazi die Andoni Zubeldiari eta Mikel Urdangarini
Beasaingo aurtengo eskuz binakako pilota txapelketak baditu irabazleak. Xabier Urteaga eta Unai Goikoetxea. Gorriz jokatu du bikote honek finala, eta eroso irabazi die 22 eta 9ko emaitzarekin Andoni Zubeldiari eta Mikel Urdangarini.
Finalaren aurretik txapelketaren 3. eta 4. posturako partida jokatu dute Aranburu anaiek eta Kuman eta Salinasek. Aranburutarrek irabazi dute eta 3. geratu dira, beraz, txapelketan.
Gernika pasealekuko pilotalekua jendez bete da txapelketaren azken txanpa jarraitzeko. Txapeldunek, bestalde, ospakizun bikoitza izan dute, ordu bete lehenago areto futboleko txapelketa irabazi duen Garaitezinak kuadrillako kideak direlako.
Kirolaz gain, Loinatz jaietako astelehenak izan ditu protagonista gehiago, kuadrillen eguna ere badelako. Eguerditik aurrera Beasaingo kaleak kolorez eta giroz bete dituzte herriko kuadrillek.
Hona hemen futbol areto eta pilota txapelketetako finalak eta kaleko giroa jasotzen duen bideoa
