Igartza auzoa festarako prest
Bihar meza eta erromeria egingo dituzte Loinazko ermitan. Ostiralean 18:00etan botako du jaien hasierako danbatekoa. Larunbatean Igartzako Dantzarien eguna da
Auzoetako jaien hilabetea izaten da iraila Beasainen, eta bihar hasi eta igandera arte, Igartza-Loinatz auzoaren txanda da. Loinazko futbol zelaiaren ondoko aparkalekua izango da festa gune nagusia. Egitaraua biltzen duen liburuxka argitaratu dute aurten auzotarrek.
Hasteko, bihar, 18:00etatik aurrera, 1981. urteaz geroztik antolatzen duten meza eta erromeria egingo dute Loinazko ermitan. Ostiralean, berriz, 18:00etan botako dute festa hasierako danbatekoa. Jarraian, buruhandiak, Linaje magoaren ikuskizuna (18:45) eta ardo dastaketa (19:15) izango dituzte. Gauean, berrikuntza gisa, hiru talderen kontzertua antolatu dute: Kol-P, Bullet Proof Lovers eta Pho-Bo.
Larunbat goizean 11:00etan haur jolasez eta 12:00etan apar festaz gozatzeko aukera izango dute txikienek. 13:00etan poteoa egingo dute Beti Berandu txarangak alaituta. 16:00etan mus txapelketa eta 16:45ean patata tortilla lehiaketa hasiko da. Patata tortilla lehiaketarako 635 162 387 telefonoan eman behar da izena, bikoteko 8 euro ordainduta. 19:00etan, txinga eta sokatira saioak izango dira eta 21:00etan herri afaria egingo dute, mozorroturik. Afarirako txartelak 3 euroan daude salgai: oilasko errea patatekin, edaria eta ogia. Mozorro lehiaketako parte hartzaileek eskenatokira igo beharko dute afaria bukatu ondoren. Saria, 60 euro. Helduen karaokearekin amaituko da eguna; irabazleak bi afari jasoko ditu.
Igandean, azkenik, 11:00etan puzgarriak, 12:00etan apar festa, 12:30ean Laguntasuna Errondaila eta 14:30ean paella erraldoiarekin herri bazkaria izango dituzte Igartzan. Arratsaldean, berriz, Gelo Fuentesekin bakarrizketak (17:00), buruhandiak (18:30ean) eta trikipoteoa (19:00).
