Elkartasun eske Lazkaon
Rwanda Elkarteak bihar hasiko du Elkartasun Asteko egitaraua, 22ra arte. Felix Alonso taldekideak Giharako irudiak eta berriak emango ditu, Ruandatik iritsi berri. Ohiko ekitaldiak ere badira
Urtero Gabonak inguratzearekin egin duen legez, Lazkaoko Rwanda Elkarteak Afrikako herrialde hartara bideratuko du lazkaotarren begirada, Gihara herrian oinarrizko azpiegiturak eraikitzeko eta hornitzeko lana ikusarazteko. Urteak daramate elkartasunezko jarduerak burutzen. Aurten, Rwandarwejo edo kaleko umeen ikastxokoaren alde izango da bildutako dirua.
Ohiko ekitaldi sorta prestatu dute, bihar hasi eta abenduaren 22an bukatuko den Elkartasun Asterako. Argazki erakusketa, bidezko merkataritzako produktuen salmenta, bigarren eskuko jostailuen merkatu txikia, film emankizuna, ipuin kontalaria eta Elkartasun Jaialdia izango dira, San Benito ikastolarekin elkarlanean.
Hain justu, Ruandako azken-azkeneko berriak jakiteko modua izango da. Felix Alonso taldekidea gaur edo bihar iritsiko da Giharatik. Materiala eraman du lazkaotarrak, tartean Lazkao Kirol Elkarteak emandako futboleko kamisetak. Elkartasun Astea Alonsok berak irekiko du, Ruandako argazkien erakusketa jarriz eta herriko beste bi kooperatzailerekin batera —Jessica Cantero eta Eider Saez— solasaldia eginez, aretoan bertan.
Gihara, egunerokoan
Alonsoren Rwanda: egunerokoaren argazkia erakusketa eta aretoan bertan egongo den bidezko merkataritzako produktuen azokatxoa izango dira Elkartasun Asteko bizkarrezurra, 14tik 22ra, kultur etxean.
Ohiko bizimoduan, egunerokotasunean egiten dituzten jarduerak nola garatzen dituzten islatuko du Alonsok, iruditan. Ruandako lanez gain, Canterok Etiopiako eta Tanzaniako kooperazio esperientzia, eta Saezek Indonesiakoa azalduko dute, aurten ibili baitira.
ELKARTASUN ASTEA
Erakusketa: Felix Alonsoren Ruanda: egunerokoaren argazkia. Abenduaren 22ra arte, kultur etxeko aretoan. Irekiera eta Alonso, Jessica Cantero eta Eider Saez kooperatzaileen solasaldia, bihar 19:00etan. Azoka. Bideko merkataritza produktuak. Abenduaren 14tik 22ra, kultur etxeko aretoan. Jaialdia. San Benito ikastolako ikasleen emanaldia. Etzi, 17:00etan, Arerian. Jostailu salmenta: Merkatu txikia, Liburu Azokan. Abenduak 15, 16 eta 17an, plazako frontoian. Ipuinak. Umeentzako Heldu eskutik kontakizuna, Dorleta Kortazarrekin. Abenduak 19, asteartea, kultur etxeko erakusketa aretoan, 17:30ean. Zinema. La reina de Katwe filmaren emanaldia. Abenduak 20, asteazkena, 21:30ean, Arerian.
