Kirol eguna da gaur Legazpin Haztegi ikastolaren ekimenez
Legazpiko Euskal Herria plazan ez ohiko kirolak ezagutzeko aukera dago gaur goiz eta arratsaldez Haztegi Ikastolak antolatutako jardunaldiari esker. Monozikloa, eskalada edo slackline deiturikoa dira egitarauan jasotako kirolak.
Kirol jardunaldi hau Haztegi ikastolaren 50. urteurrenaren ospakizunen barruan kokatzen da. Ikasturte hasieratik dabiltz ikastolakoak ospakizunetan murgilduta. Gaurko hitzordu honen ondoren, bihar mendi ibilaldia egingo dute (Haztegi-Zatui-Saletxe-Mirandaola), eta hurrengo larunbaterako, hilak 21, rock kontzertua dago iragarrita. Kontzertua Haztegiko patioan egingo da 22:00etan hasita, eta Esne Beltza, Willis Drummond eta John Dealer & The Coconuts taldeek parte hartuko dute. Sarrerak aurrez eros daitezke 10 euroan ikastolan bertan eta herriko hainbat tokitan, baita egunean bertan ere, 14 euroan.
