Olaberriak palako Herriarteko Euskal Herrikoa jokatuko du
Gipuzkoako Herriartekoa irabazi eta gero, Euskal Herrikoa jokatuko du Olaberriko pala taldea. Gaur dute aurreneko jardunaldia, Olaberrian.
Gipuzkoako Herriarteko pala txapelketa irabazi ondoren, eta titulu horrek damaion eskubidearekin, Olaberriko palari taldeak Euskal Herriko Herriarteko Txapelketa jokatuko du. Arabako txapeldun geratu den Gasteizko taldea izango du aurkari, nazio mailako finalean.
Bi jardunalditara jokatuko da finala. Lehenbizikoa, gaur 19:00etan, Olaberriko udal pilotalekuan izango da. Itzulikoa, berriz, igandean jokatuko dute Gasteizko Abetxuko auzoko pilotalekuan, 11:00etan.
Bost urteko historia du Euskal Herriko Herriarteko Txapelketak, eta herrialde bakoitzeko irabazleek jokatzen dute nazioko txapela, modalitate denetan. Olaberriak aurreneko aldiz parte hartuko du. Aurkari oso gogorra da Gasteiz, azken hiru urteetako Euskal Herriko txapelduna bera baita.
Bi espezialitateetan
Herrialdeko Herriarteko txapelketan bezala, final handian ere palako bi espezialitateetan jokatuko dute: paleta larruz lehenengo, eta pala motzean ondoren. Garikoitz Arrieta, Imanol Olaran, Josema Garrido eta Xabier Berasategi ariko dira.
