Hasi dira 'Santikutz birus jaiak' Legazpin
Aurtengo festak balkoietan eta pantailekin ospatuko dituzte legazpiarrek. Legazpinsortzecovidea ekimenak ekintza egitaraua prestatu du gaurtik igandera arte, eta udalak iazko jaietan ateratako bideoak jarriko ditu ikusgai bere webgunean
Pregoia irakurrita eta txupinazoa botata, hasi dira Legazpiko festak. Aurten ez da izango Santikutz jai ofizialik maiatzean, koronabirusaren krisiak bertan behera utzi dituelako, baina legazpinsortzecovidea.eus webgunea sortu duten herritarrek, balkoi eta pantailetatatik ospatzeko festak prestatu ditu, gaur hasi eta igandera arteko egitaraua osatuta.
Webgune horretatik zuzenean emititutako pregoiarekin eta txupinazoarekin hasi dira festak. “Legazpiarrak festazaleak gara eta gu ez gaitzute geldiaraziko. Musika, bertsoa, kantu afaria, danborradak, txistu eta dultzaina… Hasi ba eta eman gogor festari… Gora Legazpi!” esanez amaitu den pregoiaren ondoren jaurti dute suziria, eta trikiti doinuek eman diote jarraipena festari. 20:00etarako kantu afaria dago iragarrita. Jaiek igandera arte jarraituko dute.
Udalak, bestetik, egin du bere proposamena, eta iazko jaietan ateratako bideoak eta argazkiak jarriko ditu ikusgai egunez egun bere webgunean (legazpi.eus); gaurtik txupinazoa ikus daiteke. Udaletxeko balkoia ere apainduta dago, baita herriko hainbat gune ere, Urbeltz pilotaleku atzealdeko Plazaola kalea, besteak beste.
Hona hemen egitarauak.
Ostirala, maiatzak 1
legazpinsortzecovidea.eus
10:00. Dultzaineroen kalejira.
12:00. Disko ibiltaria, Ilintirekin.
16:00. Lehiaketa, aurkezpena.
18:00. Umeen danborrada.
19:00. Sorgintxulo, haur jolasak.
22:00. Erromeria: Ane Arrizabalaga-Ane Urzelai, Oihane Gurrutxaga-Uxue Untzilla, Jon Ibarguren-Idoia Elustondo eta Mikele Zurutuza-Julene Ros.legazpi.eus
Haurren danborradako bideoa.Larunbata, maiatzak 2
legazpinsortzecovidea.eus
16:00. Lehiaketako 2. galdera.
19:00. Bertso saioa. 22:00. Danborrada. Jarraian, Hartu Arteren kontzertua.legazpi.eus
2019ko ganadu feriaren eta herri danborradaren bideoak.Igandea, maiatzak 3. Santikutz eguna
legazpinsortzecovidea.eus
10:00. Txistularien kalejira.
12:00. Santikutz martxa eta ezpata dantza.
16:00. Lehiaketako 3. galdera. 18:00. Euskaraldia, aurkezpena. 20:00 Sukaldaritza lehiaketa, eta mozorrodun argazkien irabazleak.legazpi.eus
Ezpatadantzaren eta Olaria saria ematearen bideoa, eta Euskaraldiaren aurkezpenarena.
