Lau egun ekintzaz blai, Segurako San Joan jaiez gozatzeko aitzakian
Jaien iragarle den Zopa Pertza bihar arratsaldean jaitsiko dute. Pregoia eta txupinazoa, mendizale taldearen eskutik. Gazteen arteko herri kirol desafioa, ostiral arratsaldean.
San Joan jaietako txupinazoaren unea iaz, Iparra-Hegoa elkarteko kideen eskutik. // Argazkia: Laida Goiburu Dena prest dute Seguran bihar San Joan jaiei hasiera emateko. Ekintzaz jositako lau egun bete izango dituzte segurarrek aurretik, herriko festa kuttunenez gozatzeko. Kale animazioa, kirol saioak, musika, askotariko erakustaldiak, tradiziozko ekintzak eta jana eta edana ez dira faltako aurtengo egitarauan ere.
Bihar, 19:00etan izango da Zopa Pertzaren jaitsiera eta jaiei hasiera emateko ekitaldia, plazan. Segura Kirol Elkarteko mendizale sailekoak izango dute aurten pregoia irakurtzeko ardura. «Ilusioz» hartu dute gonbita, Txetxu Ormazabalen hitzetan. Pregoian luzatuko duten mezua bihar arte sekretupean mantenduko dute, baina «mendiaz eta festaz» arituko direla aurreratu du.
Zopa Pertzarekin igoerarekin amaiera
Lehendabiziko eguna Mozorrotuen eguna izaki, mozorroak izango dira protagonista; kuadrillen topaketa eta sari banaketa dira azpimarratu beharreko ekintzetako batzuk. San Joan bezpera, jubilatuei eskainitako eguna izango da. Toka, Igela eta Bote jokoak antolatu dituzte goizean plazan, besteak beste. Iluntzean, berriz, San Joan sua eta herri-akelarrea.
San Joan egunean, ohiko meza nagusia izango da goizean, eta bertsolariak, herriko abesbatza eta hamaiketakoa ondoren. Kuadrillen eguna izanik, kuadrillen arteko bazkaria eta kuadrillen arteko jokoak daude nabarmentzekoen artean. Igandean, haurrentzako ekintzak nagusitiko dira eta hasi bezala, Zopa Pertzaren igoerarekin amaituko dituzte jaiak, gauerdiko agur zaratatsuarekin.
Txosna gunean, musika nagusi
Segurako Txosna batzordeak ere guztia prest du San Joan jaiei ekiteko. Bihar, mozorro egunean zozketa egingo dute 21:00etan eta Iltze, Balantza, DJ Espuela eta DJ Distorded Bassen kontzertua 22:30ean hasita. San Joan bezperan, herri bazkaria egingo dute 15:00etan, eta Soinuz Blai eta DJ Naza musikarien emanaldiak gauerdian hasita.
Hilaren 25ean, Kuadrillen Eguneko bazkaria izango da 15:00etan, eta 23:00etan Emaion eta DJ Euken. Igandean, poteo elegantea izango da 20:00etan, eta 23:30ean Zopa Pertzarekin kalejira.
