Lintxori golak sartzeko aukera izango da Legazpiko futbol-7 txapelketan
Ilintik antolatutako ekintza berezi hau bi saiotan egingo da, eta lehena larunbat honetan izango da, futbol zelaian, 17:00etan; bigarrena, finalaren egunean, uztailak 1. Baloiak zozkatuko dituzte partaideen artean.
Lintxo maskota futbol zelaian, baloi batekin. ARGAZKIA: Ilinti Legazpiko Ilinti merkatari elkarteak aurten ere parte hartuko du herriko futbol-7 txapelketan, Sartu gola Lintxori ekintzaren bitartez. Lehiaketa moduko bat izango da, 11 urtetik beherako gaztetxo eta haurrei zuzenduta, eta Irene Paredes futbol zelaian egingo dute.
Bi saio izango dira. Lehena, larunbat honetan jokatuko diren final laurdenekin batera izango da, 17:00etan hasita. Eta hurrengo asteko larunbatean, uztailak 1, hau da, finalaren egunean, bigarren saioa egingo dute, 12:00etan.
Lintxo maskotari golak sartzen saiatzen direnen artean baloiak zozkatuko dituzte. Larunbat honetako saiorako sei baloiak prest daude.
