Dendak kalera aterata, Ilintik festa egun betea antolatu du biharko
Saltokien aurreetara aterako dituzte produktuak batzuk, eta beste batzuk Kale Nagusian postua jarriko dute. Musika, jatekoa eta haurrentzako jarduerak ere izango dira.
Ilinti merkatari elkarteko dendak eta zerbitzuak kalean egongo dira egun osoan zehar bihar, herriko erdigunea merkatalgune erraldoi bihurtuz. Dendak Kalera egitasmoaren edizio berri bat da, eta kalean jarritako saltokiak 09:00etatik 20:00ak arte egongo dira irekita.
Aurtengo Dendak Kalera festan 14 komertziok parte hartuko dute. Gehienak Ilintiko kideak dira, baina beste batzuk ez. Arropa, oinetako, optika, lore, edergintza, osasun eta eraikuntza arloetakoak dira, eta batzuek postua dendaren aurrean jarriko duten bitartean, beste batzuek Kale Nagusian jarriko dituzte. Postu batzuetan beherapenak ere jarriko dituzte.
Jai giroa eta jarduera asko
Dendak Kalera festa giroan egingo da, eta musika eta beste hainbat ekintza izango dira horretarako. Herriko Trapalata txaranga arduratuko da arratsaldean merkatalgune erraldoi hori girotzeaz, baina horrez gain, jatekoa eta edatekoa, haurrentzako ekintzak eta musika gehiago ere izango dira.
Jatekoak elkartasun zaporea izango du, gainera, eta eguerdi partean paella errazioak eta fruta brotxetak jarriko dituzte salgai. Edatekoak ere helburu solidarioa izango du, eta iazko esperientzia onaren ondoren, Asier de la Iglesia saskibaloi jokalariak eta esklerosi anizkoitza duenak Mudita garagardoa izango du salgai bere furgonetan.
Haurrek ere izango dute tokia Dendak Kalera egitasmoan, eta arratsaldean puzgarriak izango dituzte jolasteko. Lintxo goizean eta arratsaldean aterako da kalera, eta konbo taldeen kontzertuekin amaituko da festa.
Dendak kalera
Partaideak:
– Eder lentzeria,
– Laubide belar denda,
– Kiska arropa eta osagarri denda,
– Oskarbi optika,
– Kuka’s arropa denda,
– Santa Cruz pinturak,
– Korosti kafea,
– Aranzazu optika,
– Mimaru lora denda,
– Urcelay oinetakoak,
– Cristina arropa denda,
– Ibargutxi Kirolak,
– Maitia haurrentzako arropa eta oinetako denda,
– Lanbroa Bi belar denda,
– Suarez berrikuntzak,
– Mudita garagardo solidarioa.Egitaraua
– Dendak 09:00etatik 20:00ak arte irekita.
– 12:00etan, Trapalata txarangaren emanaldia.
– 12:30ean, Lintxo maskota aterako da.
– 13:15, paella errazio eta fruta brotxeta solidarioak salduko dira.
– 15:30ean, umeentzako puzgarriak.
– 17:00etan, Lintxo.
– 18:00etan konbo taldeen kontzertuak.
