Gabon irudien lehiaketa egingo du bihar Arkatza elkarteak
Herriko Lehen Hezkuntzako ikasleei zuzenduta dago. Sei sari emango dituzte, maila bakoitzeko bana. Irabazleen lanak ikusgai jarriko dituzte Kultur Etxean.
Iazko lehiaketako irabazleak. ARGAZKIAK: Legazpiko Udala Arkatza elkartearen urteroko Gabon irudi lehiaketa bihar egingo dute, Kultur Etxean, 10:00etatik 13:00etara, herriko Lehen Hezkuntzako ikasleei zuzenduta. Sei mailatan banatuko dira ikasleak, eta guztiek Gabonen inguruko marrazkiak egin beharko dituzte, arkatzak, margoak arkatz ziriak eta kotoia edo brillantina bezalako beste materialak erabilita (norberak eraman beharko ditu).
Sari banaketa hurrengo asteartean, hilak 19, egingo dute Kultur Etxean, 18:30ean. Maila bakoitzeko sari bat emango dute. Irabazleen lanak ikusgai egongo dira, Kultur Etxean.
Iazko irabazleak hauek izan ziren: 1. mailan, Markel Gonzalez; 2. mailan Ibon Huerta; 3. mailan, Irune Fernandez; 4. mailan, Hirune Garcia; 5. mailan, Irati Garcia, eta 6. mailan, Ibai Olano.
