Errege Magoentzako gutunak larunbatean jasoko dituzte Legazpin
Azokan izango dira erregeen laguntzaileak, 18:00etatik 19:30era bitartean, Korosti dantza taldeko kideekin batera. Kabalkadaa igandean egingo dute, kiroldegitik 18:00etan irtenda.
Urtero bezala, Errege Magoentzako gutun bilketa egingo dute aurten ere Legazpin, Korosti dantza taldeko kideen laguntzarekin. Erregeen laguntzaileak larunbatean Azokan egongo dira, 18:00etatik 19:30eraino. Ohi bezala, haurren eta familien itxaronaldia gozatzeko gaztaina erreak banatuko dituzte.
Errege Magoak hurrengo egunean iritsiko dira, eta urteroko desfilea egingo dute, Kiroldegitik 18:00etan abiatuta. Herrian zehar egingo duten ibilbidean bi geldiune egingo dituzte, lehena Laubide auzoko kale nagusian, eta bigarrena eta azkena, Euskal Herria plazan. Plazan jaiotza egongo da jarrita eta erregeek ohiko eskaintza egingo dute. Korostiko kideek dantza saioa egingo dute. Amaieran, udaletxeko balkoian izango dira Erregeak.
Kabalkadan parte hartu nahi duten legazpiarrek 17:00etan kiroldegian azaldu beharko dute, eta ibilbidean zehar opariak banatzea nahi dutenek, 16:00etatik 17:30etara bitartean eraman beharko dituzte kiroldegira, eta arduradunei adierazi non eta nori banatuak izan behar diren.
