Aurrekoak baino euritsuagoa izan da 2024 urtea Legazpin
Udalak urteroko txosten meteorologikoa aurkeztu du, Goenagako estazioan jasotako datuekin osatutakoa. Euri gehiago egiteaz gain, iaz 2023an baino freskoago egin zuen.
Urrian euripean inauguratu zuten Mirandaolako Elkargunea.Tere Madinabeitia Goenagako estazio meteorologikoan jasotako datuen txostena kaleratu du Udalak. Balantze meteorologiko horren arabera, 2024a aurreko urtea baino freskoagoa izan da, euri gehiago egin du, eta elurrik ez du egin.
Alonso Frances udal aparejadorea arduratzen da 1993tik Legazpiko datu horiek egunero biltzeaz, eta Aemet estatuko meteorologia agentziara helarazteaz. Urteroko txostena ere berak egiten du.
Tenperaturek, behera
2024a aurreko urtea baino hotzagoa izan da. Batez besteko tenperatura 12,98 gradukoa izan da, eta 2023an 13,84 gradukoa. Iazkoa, azken hamarkadako bigarren urterik hotzena izan da, baina 1957tik neurtutako datuekin egindako batez bestekoaren gainetik egon da, 12,70 gradukoa baita.
Urteko egunik beroena abuztuaren 11 izan zen, 38,5 gradurekin, eta hotzena urtarrilaren 19a eta 20a, -4,5 gradurekin. Abuztua izan zen hilabeterik epelena, batez besteko 18,71 gradurekin, eta abendua hotzena, 7,62 gradurekin. Bederatzi egun izan dira 0 gradu azpiko tenperaturekin, eta 17 egun 30 gradutik gorako neurketekin.
Iaz baino euri gehiago
Euriari dagokionez, igo egin dira prezipitazioak 2023arekin alderatua. Iaz 1.564litro jaso ziren, eta aurreko urtean, 1.317 litro. Azken 79 urteetako batez bestekoa urteko 1.534,29 litrotan geratu da.
Elurra aipatu behar da, ez duelako egin Goenagako estazio inguruan. Txingorrik ere ez du egin, ekaitza sei egunetan, behe lainoa 15 egunetan eta ihintza 112 egunetan.
URTEKO DATU ESANGURATSUENAK
Tenperatura batez beste
12,98 gradu.
Tenperatura maximoa
38,5 gradu: Abuztuak 11.
Tenperatura minimoa
-4,5 gradu: Urtarrilak 19-20.
Hilabeterik epelena
Abuztua: batez beste 18,71 gradu.
Hilabeterik hotzena
Abendua: batez beste 7,62 gradu.
Euria urte osoan
1.564 litro.
Egunik euritsuena
Otsailak 26: 88,41 litro.
Euria zenbat egunetan
193 egunetan.
Hilabeterik euritsuena
Abendua: 249,70 litro
Hilabeterik lehorrena
Uztaila: 23,6 litro.
