Legazpiko pilota txapelketarako izena emateko epea ireki dute
Otsailaren 2an da azken eguna. Binakako txapelketa da, eta 16 urteko herritarrei zuzenduta dago. Otsailaren 14an hasita, fInala Santikutz jaietan jokatuko da, maiatzaren 1ean.
Iazko finalistak: urdinez, Perez eta Altzelai eta gorriz, Markotegi eta Garmendia.Goierriko Hitzako Legazpiko eskuz binakako pilota txapelketa herrikoiaren 18. edizioa abiatu da. Legazpiko Gazteak kirol klubak ireki du dagoneko izen-ematea. Otsailaren 2ra arteko epea dago izena emateko, eta txapelketa otsailaren 14an hasiko da. Ohi bezala, Santikutz jaietan jokatuko da finala, aurten maiatzaren 1ean, ostegunean.
Txapelketan parte hartzeko gutxienez 16 urte izan beharko dira, hau da, 2009an edo aurreko urteetan jaiotakoek parte hartu ahal izango dute. Gainera, partaideak Legazpin jaioak, hazitakoak edo bertan bizi direnak izan beharko dira. Bikoteko 20 euro ordaindu beharko dute.
Izenak emateko tokiak hauek dira: Gaztetxea eta Karibe Zaharra, KaribeBerria, Giroa, Maiatza, Kukue eta Urbeltz tabernak.
Otsailaren 14an hasita
Izena emateko epea amaitu eta bi egunetara, otsailaren 4an, bilera egingo dute antolatzaileek partaide guztiekin Kultur Etxean 18:00etan. Bikoteen zozketa egingo dute bertan, eta txapelketari buruzko informazioa zabalduko dute. Txapelketa ligaxka eran jokatuko da, otsailaren 14an hasita
Legazpiko txapelketa herrikoi honen 18. edizioa irabazten duen bikoteak txapelak, garaikurrak eta opariak jasoko ditu. Bigarren sailkatzen direnentzat garaikurrak eta bertako produktuez osatutako saskiak egongo dira, eta hirugarren eta laugarren bikoteek garaikurrak jasoko dituzte.
Arrakasta handikoa
Arrakasta handia duen txapelketa da hau, partaidetzaren aldetik eta erakartzen duen publikoarengatik. Iaz 37 bikotek parte hartu zuten, eta ohi bezala, Urbeltz pilotalekua goraino bete zen finaleko partidetarako. Izan ere, finala jai nagusietako gazteen bazkari herrikoiaren ondoren egiten da.
Iazko irabazleak Beñat Perez eta Oier Altzelai izan ziren, eta Aritz Markotegiri eta Urko Garmendia txapeldunordeak. Hirugarren postuan Luis eta Josu Ibarguren aita-semeak geratu ziren, eta Aitor Agreda eta Markel Arrizabalaga laugarrenak.
Haurren txapelketa
Txapelketaren honen parean, haurrena ere jokatu ohi izan da, kimu, aurre benjamin eta benjamin mailako pilotarientzat, hori ere Legazpiko Gazteak klubak antolatuta. Aurten 15. edizioa beteko du honek
