Ordizian 'Hitz egin dezagun gure zaintzaz' hitzaldi zikloa antolatu dute
Otsailean bina orduko lau saio antolatu dituzte, Olaia Arana Alvarez adituak gidatuta. Izena eman behar da.
Olaia Arana Alvarez adituak gidatuko ditu saioak.Goiena. Zaintzaren inguruan martxan jarri dituzten dinamikaren barruan, otsailean lau hitzaldiz osatutako zikloa antolatu dute Ordizian. Hitz egin dezagun gure zaintzaz goiburupean, Olaia Arana Alvarez adituak gidatuko ditu bina orduko lau saioak. Zuhaiztiko aretoan izango dira.
“Bizitza itxaropena luzatzeak eta gizarte ereduen aldaketek arreta ikuspegi tradizionala berrikustea eskatzen dute. Arreta behar duten pertsonen profila aldatu egin da; gehiago dira, itxaropen handiagoak dituzte eta etxean zaintzak jasotzeko gogo handia adierazten dute. Horrek guztiak zaintzaren eredu tradizionala berrikustea eskatzen du”, diote udaletik. Horrela, “zainketa pertsonalekin eta etorkizuneko plangintzarekin lotutako gaiak oso garrantzitsuak dira pertsona askorentzat, batez ere adineko senideak dituztenentzat edo gaixotasun kronikoei aurre egin behar dietenentzat”.
Beraz, saio hauen helburua, “parte hartzaileak beren osasunari eta etorkizuneko ongizateari buruzko erabaki informatuak hartzeko ahalduntzea da, hausnarketa sustatuz eta gertuko ingurunearekiko zainketei buruzko elkarrizketa prozesu bat sustatuz, mendetasun eta hauskortasun egoeretarako. Horrek areagotu egin dezake kontrol-sentsazioa eta sor daitezkeen erronkei aurre egiteko gaitasuna”.
Otsailean lau saio
Udalak aurreratu duenez, saio bakoitzak zati pedagogiko-teoriko bat eta hitzaldi bat ditu, eta beste bat harreman ariketak, talde dinamikak eta elkarrizketak, talde txikietako eztabaidak eta baterako hausnarketak egiteko. 15:30etik 17:30era izango dira.. Egitaraua ondorengoa da:
- Otsailak 5: Zuk jakitea nahi dut gida (2 ordu).
- Otsailak 12: Aurretiazko borondateen agiria: Hiltzen laguntzeko prestazioa (eutanasia) (2 ordu).
- Otsailak 19: Prebentziozko notario-ahalordeak (2 ordu).
- Otsailak 26: Laguntza eta zalantzak ebaztea – Dokumentuak betetzea (2 ordu).
Hitzaldi ziklo hau, gaiarekin interesa duten herritar guztiei dago zuzenduta, eta saioak elebitan izango dira. Izena emateko garaian, “Ordizian erroldatuta dauden herritarrek izango dute lehentasuna”.
Izena eman behar da aurrez
Aurrez eman behar da izena, 747 406 469 zenbakira deituta edo whatsapp mezu bat bidalita, edo gizartehezitzailea@ordizia.eus helbide elektronikora idatzita.
Udalaren esanetan, “saio jakinetarako izena eman badaiteke ere, denetarako apuntatzea gomendatzen da, zikloa bere osotasunean jarraitzeko”.
