Lintx eta katamaloak iritsi dira, Legazpiko inauteriei hasiera ofiziala ematera
Ikastetxeen mozorro desfilearen ondoren plazan agertu dira, festak igandera arte luzatuko direla iragartzeko. Bihar gazteen eguna da, eta igandea, Sustraiak taldearen konpartsarena.
Doinua musika eskolakoek Ostegun Gizeneko kalejira egin zuten atzo, Floren Gutierrez mozorrotuta dabil kalean gaur goizetik, herriko ikastetxeek mozorro desfilea egin dute, eta azkenik, Lintx eta katamaloak iritsi dira, Trapalata txarangaren doinuek lagunduta. Legazpi inauterietan bete-betean sartuta dago, eta igande iluntzera arte festa girorik ez da faltako.
Lintxek eta katamaloek eman diete hasiera ofiziala inauteriei 17:00etan, baina aurretik Domingo Agirreko ikasleek jaialdia egin dute Urbeltz pilotalekuan euskal jaiei eskainitako mozorroekin, eta kalera atera dira gero desfilean. Haztegi ikastolako ikasleek kaleko modak aukeratu dituzte mozorrotzeko aurten, eta Domingo Agirrekoekin batera desfilatu dute herriko erdiguneko kaleetan. Amaieran, plazan elkartu dira, denek batera dantza pare bat egiteko.
Lintx eta katamaloak iritsi dira ondoren, Floren Gutierrezek adarrarekin deituta, eta Trapalatako musikariekin batera, lehertu da festa. Horren ondoren, mozorrotutako kuadrillez eta karroza txikiz bete da Legazpiko erdigunea, eta hortik aurrera, kalean eta taberna barrutan izango da festa. Mariatxi doinuak ere izango dira, Alaitasuna errondailak egingo duen kalejirarekin.
Bihar gazteen eguna izango da, Gazte Asanbladak olinpiadei eskainita egun osorako antolatutako egitarauarekin, eta igandean, 35 urteetan zehar kaleratutako inauteri konpartsak bat eginda aterako dira kalera Sustraiak dantza taldeko kideak eta hainbat herritar, mozorro eta festa asteburuari amaiera emateko.
