Arrobin erakundeek eta ganaduzaleek bat egin dute kontserbazio proiektu bat gauzatzeko
Basoko lursail publikoen kudeaketa egokirako erakundeen eta ganaduzaleen arteko elkarlana ezinbestekoa dela erakutsi dute Arrobiko proiektuarekin.
Legazpiko Udala Arrobi mendiko lursailak berreskuratzeko lantzen ari den proiektuak Landaola saria jaso berri du. Gipuzkoako landa garapen elkarteen federazioa da Landaola, eta bertan dago Goierriko Goimen elkartea. Sari horiek lurraldeko landa garapen proiektuei aitortza egiteko helburua dute.
Proiektu hau, Aldundiarekin, Aldundiaren Etorlur sozietate publikoarekin eta Naturzaindia Kontserbazio Biologikoaren elkartearekin eta herriko ganaduzaleen elkartearekin lankidetzan ari da burutzen udala.
Ganaduzaleekin elkarlana
Udal ordezkariek nabarmendu dutenez, Arrobin garatzen ari diren proiektuari baino gehiago, elkarlanari eman diote Landaola saria. Edurne Matias Nekazaritza alorreko zinegotziak azaldu du proiektu hau garatzeko orduan «kontziente» zirela «ganaduzaleekin adostasun bat edo elkarlan bat» behar zutela, ingurune horren kontserbaziorako agente garrantzitsuak direlako: «Egundoko lana egiten dute, auzolanean beti, larunbatetan, igandeetan… Sastrakak kendu dituzte duela gutxi, eta bide bat ere egin dute. Inplikazio handia dute».
Arrobi Brinkolan dagoen mendia da, eta udalak 92 hektareako azalera duen lursail bat du bertan, Etorlurrekin eta Aldundiarekin batera kudeatzen duena. Zati bat larreak dira, eta Legazpiko ganaduzale elkartean biltzen diren ganaduzaleek erabiltzen dituzte zaldi, behi, ahuntz eta ardiekin, baina zatirik handiena, lursail osoaren %78, basoa da.
Hiru ataleko proiektua
Arrobiko proiektuak 57.000 euroko aurrekontua du, eta hiru ataletan banatuta, faseka ari da garatzen. Baso landaketa da ataletako bat. Han dagoen ameztiari indar gehiago eman nahi zaio, bere habitatak interes europarra duelako. Hori dela eta, ameztia lehengoratzeko eta kontserbatzeko ametz gehiago landatuko dira, eta larizioa dagoen basoan, bi pinutatik bat kenduko da.
Larreen gunean, ganadu karga adostuko da ganaduzaleekin, eta eremua laster handitu egingo da beste bederatzi hektarea belardi bilakatuta. Bitartean, gaur egun erabilgarri dagoen eremuan inbertsio bat dute aurreikusita aurtengo urterako, eta askak aldatuko dituzte Aldundiarekin eta Etorlurrekin batera.
Oraingo larre gunean, bestetik, zohikaztegiak daude, eta horiek ere intereseko elementuak izanik, itxitura batekin babestuko dira, ganaduak ez zapaltzeko.
Lursail publiko gehiago
Brinkolan bertan, Kortaburu inguruan ere baditu bere jabetzako lurrak udalak, 2023. urtean erosi ondoren. Lehen pinudia zegoen lursail horretan, eta zati bat larre bihurtuta, gainerakoan haritzak eta ametzak ari da landatzen. Propio aukeratutako espezieak dira, baso autoktonoaren aldeko apustuaren barruan. Legazpin, herrigunetik gertu, Arrasaten ere baditu lurrak, eta horietan ere ari da landaketak egiten, Eusko Jaurlaritzatik diru laguntzak iritsi ahala.
Mendi irteera
Landaola sariak izan duen oihartzuna baliatuz, udalak Arrobiko proiektu horren berri zuzena eman nahi die herritarrei, eta horretarako mendi irteera bat egingo du bertara. Maiatzaren 18an izango da, igandean, eta Aztiriatik gora joanda egingo da. Dagoeneko izena eman daiteke udalaren legazpi.eus webgunean, eta apirilaren 11 da horretarako azken eguna.
Naturzaindia elkarteko kideak izango dira irteeran gidari, eta paraje natural horretan ingurumenaren errespetua eta kontserbazioa sustatuz egiten ari diren lanak azalduko dituzte. Abeltzainek egiten duten lana ere ezagutaraziko dute.
Eguna gerturatu ahala irteerari buruzko xehetasun gehiago emango ditu udalak.
