Elixabete Martin legazpiarrak bere bigarren liburua aurkeztuko du gaur
Lanak ‘La mitad de S’ du izenburua, eta salgai dago Legazpiko hainbat tokitan. 2020an kaleratu zuen ‘La chica S’ eleberriaren jarraipena da. Aurkezpena Kultur Etxean izango da, gaur, 19:30ean
Idazle andanak ez du mugarik Legazpin, ezta liburu jarioak ere. Gaur lan berri bat aurkeztuko da herrian, Elixabete Martin Ramosen La mitad de S izenburuko eleberria. Duela bost urte kaleratu zuen La chica S lanaren jarraipena da. Aurkezpena Kultur Etxean izango da, 19:30ean.
Bi liburuak salgai daude Plazaola kaleko Xaloa estetika zentroan. Han egiten du lan Martinek, eta han erosten duenak, sinatuta jasoko du liburua. Apatxo liburu dendan eta Insausti eta Goiherri tabernetan ere egongo da salgai.
Señe, berriz protagonista
Elixabete Martin (Legazpi, 1989) 2020an estreinatu zen idazle gisa, La chica S liburuarekin. Gazteei zuzendutako eleberri laburra zen, amodio istorio bat, drama ukituarekin, eta gazteleraz idatzita.
Oraingoan, haren jarraipenarekin dator. Aitortu duenez, hasieran ez zuen bigarren parterik idazteko asmorik, baina irakurleek animatuta egin du saltoa. «Lehenengo liburua irakurri zuten batzuk nigana hurbildu ziren, eta Señe protagonistaren bizitzak nola jarraitzen zuen jakiteko gogoz geratu zirela esan zidaten». Denbora askorik ez zuela, eta aurrera egitea kostatu zitzaiola dio, «baina azkenean, istorioa sortzen eta lotzen joan nintzen, eta hemen dago».
Irakurleekin hartu-emana
Bigarren lan honetan, Señe protagonistak «auto-deskubrimendu prozesuan murgilduta» jarraitzen duela iragarri du Martinen, eta «ustez gaindituta zuen galera bat itzuliko da bere bizitzara». Oraingoan ere, «erromantzea, drama eta bilakaera emozional sakona» uztartzen dira liburuan, eta gazteei zuzendu zaie berriz ere egilea, haien segurtasun eza asko agerian jarrita. «Nik uste dut gazte askok, baita helduek ere, haien buruak islatuta ikusiko dituztela», azaldu du.
Tituluari ere erreparatzeko eskatu du, «lehenengo liburuan bezala, orrietan barrena aurkituko du irakurleak horren aukeraketarako arrazoia, oso arrazoi berezia, gainera».
Liburuak argitaratzetik gehien gustatzen zaiona irakurleekin duen hartu-emana dela nabarmendu du legazpiarrak. «Lehen liburua kaleratu nuenean, hura irkurri zutenei negar egin zutela, edo barre egin zutela entzutea izan zen gehien gustatu zitzaidana, irakurleei emozioak sortarazteko ahalmena izatea ikaragarria dela iruditzen zait».
Nekane Ibarluzearen azala
La mitad de S liburuaren azala Nekane Ibarluzeak egin du, eta Martinek azaldu duenez, «oso pozik nago emaitzarekin». Lehen liburuaren azala ere Ibarluzeak egin zuen.
Argitaletxea ere errepikatu egin du bigarren lan honetan, Circulo Rojo. Liburua autoekoizpena da, lehenengo bezala, «eta harekin izan nuen esperientzia hain ona izan zen, berriz ere argitaletxe horretara jo dudala».
