Aste Santuko prozesioa apirilaren 13an egingo dute Legazpin
Egiazko Gurutzearen Kofradiak antolatu du berriz ere, eta aurten Jesus bere amarekin elkartzen da tronua kaleratuko dute, berritu eta gero.
Egiazko Gurutzearen Kofradiak antolatuta, Aste Santuko prozesioa egingo da aurten ere Legazpin. Apirilaren 13an egingo da, 19:00etan parrokiatik abiatuta. Ohitura hori berreskuratu zenetik, seigarren edizioa beteko du aurten.
Prozesioa erdiguneko kaleetan zehar egingo dute, eta eguraldi txarra egiten badu, parrokiko arkupeetan bakarrik.
Aurten berrikuntza bat izango du, kofradiak garai bateko prozesioan atertzen ziren figurak berreskuratzen eta berritzen jarraitu duelako. Hala, aurtengo prozesiorako, Jesus Maria amarekin elkartzen da izeneko tronua edo figura multzoa konpondu dute, eta prozesioaren bigarren aro honetan lehen aldiz kaleratuko dute. Nazarenoa, Maria Magdalena, borreroa ea amabirjina daude tronu horretan, eta orain arte ez dute kaleratu, lau figuretako hiru oso egoera txarrean zeudelako. Zaharberritze lanak elizako tailerrean bertan egin dituzte.
Tronu hau prozesio osoko elementurik handiena eta monumentalena da, eta lehen, hamabi gizonen artean eraman behar izaten zuten. Aurtengo prozesioan gurdi baten gainean eramango dute.
Argazki zaharren bila
Antolatzaileak, bestalde, garai bateko Legazpiko prozesioko argazki bila ari dira, eta dei egiten diete legazpiarrei, baten bat baldin badute, laguntzeko. Argazkiak parrokiako sakristian utzi daitezke, edo kofradiako kideren bati eman, eta behin eskaneatu eta gero, itzuli egingo zaizkie jabeei.
Bigarren deialdi bat ere egin dute prozesioaren egunari begira, kandelak eramateko boluntarioak behar dituztelako. Kaleko jantziekin desfilatuko lukete, kandela eskuetan dutela. Parte hartu nahi dutenek, sakristian eman dezakete izena.
