«Atzoko nire lehenengo helburua garaipena zen»
Julen Goia errugbilari idiazabaldarrak atzo jokatu zuen Altamirako azken partida Ampo Ordizia taldearekin.
Julen Goia, atzo Altamiran.Lide Egizala. Atzokoa, Altamirako azken dantza izango zela iragarri zenuen. Eszenatokia, borobila izan zen azkenean. Partida irabazita, giro ona…
Atzokoan dena lagun izan zen. Zerrenda horretan lehenengoa, garaipena neukan; bost puntuak lortzea eta beheko postu horietatik aldentzea. Nire lehenengo helburua hori zen. Agurrarena ere hor zegoen. Kotxean Altamirara nindoanean, pentsatzen joan nintzen: hainbeste urte izan dira, eta hau ez da berriz pasako. Berezia izan zen bai atzokoa.
Matematikoki erabat ez, baina pauso oso handia eman zenuten Ohorezko Mailari eusteko.
Oker ez banago, datozen bi partidetan puntu bat lortu beharrean gaude matematikoki libratzeko. Aterako ditugu. Bestela, beste taldeen emaitzak ere ikusi egin beharko dira.
Azkeneko bi partidak irabazita, konfiantza hartuta, errazagoak izaten dira garaipenak askotan.
Bai, konfiantza hartzeko horixe behar genuen. Oso ondo entrenatzen genuen baina partida iritsitakoan, gauza bategatik edo besteagatik, azkeneko momentuan galdu egin ditugu. Horrela gogorra egiten da urtea.
Urtea gogorra joan da, besteak beste, bi talde jaitsi behar horrek baldintzatuta.
Federazioak hartutako erabaki bat da, bi talde zuzenean beheko mailara jaitsi, eta behetik talde bakarra igotzea, joan-etorriko lehiaketa bat egin nahi dutelako. Gure lehenengo helburua zen, beheko postuak saihestea nola edo hala. Oraindik puntu bat geratzen zaigu, baina klubaren helburu potoloena hori zen. Eta gero, datorren guztia ongi etorria izango da, eta play offetarako sailkatzen bagara, oso ondo.
Play Offetara sailkatzeko aukera badago oraindik.
Bai, oraindik aukerak badauzkagu. Bartzelonak bi partidak galduta eta guk biak irabazita, aukera egongo litzateke.
«Urte mordo bat izan dira eta nik uste dut inork ez duela nahi azkeneko urtean taldea bigarren mailara jaitsita geratzea»
Bartzelonaren aurka daukazue asteburuan eta apirilaren amaieran, La Vilaren aurka.
Bartzelonara goaz asteburuan. Beti bezala, arerio gogorra da. Etxean aise irabazten joan ginen lehenengo zatian eta bigarrenean buelta eman zioten partidari eta beraientzat izan zen Altamirako garaipena. Partida estua izango da beraz.
La Vilakoa, azkena, ikusi egin behar ze testuingurutan joaten garen. Edo dena eginda eta erabakita dagoen… ea zein puntutan iristen garen. Play Offetara sailkatzeko, edo puntu bakar horren beharrean…, beraiek behera jaisteko…. Horren baitan planteatuko dugu era batera edo bestera. Eta hori bai izango dela nire azkena.
Taldea Ohorezko Mailan utzita utziko duzu errugbia. Horrek ere lasaitasuna emango dizu.
16 urte dira Trevijanon debutatu nuela, Axiorekin. Lau urte Iparraldean egin nituen. Urte mordo bat izan dira eta nik uste dut inork ez duela nahi azkeneko urtean taldea bigarren mailara jaitsita uztea. Lortu dugu. Egia da azkeneko urteetan aldaketa asko egon direla taldean. Iñigo Marotiasek utzi zuenetik entrenatzaile berri bat, urtero jokalariak joan-etorrian ibili dira postu klabeetan… eta horrek pixka bat zaildu du, edo ez dio egonkortasunik eman taldeari.
Baina aldi berean, etxeko jokalari asko ditugu, etxeko jokalarientzat aukera gehiago egon da… eta uste dut gure taldearen funtsa hori dela. Lesioak egon direnean gazteak hor egon dira eta ondo erantzun dute. Gaur egun gu izango gara Ohorezko Mailan etxeko jokalari gehien daukan taldea.
