Legazpitik mundura Txillidarekin
Legazpiko dantza eta musika taldeek eta erraldoiek jendetza elkartu zuten larunbat arratsaldean Bikuña kiroldegian. Txillidarekin lan egin zuten herritarrek omenaldia jaso zuten.
Txillida, Legazpitik mundura izenburuarekin larunbat arratsaldean egin zen dantza eta musika jaialdiak jendetza elkartu zuen Bikuña kiroldegian. Txillida eskultoreak Legazpin egindako lanak munduan sakabanatuta daude, eta toki horiek ardatz hartuta, herriko dantza eta musika taldeek eta erraldoiek aparteko ikuskizuna eskaini zuten, Josu Altzelai argazkilariak prestatutako irudi sortak lagunduta.
Eskultorearen jaiotzaren mendeurrena ospatzeko Legazpiko Udalak eta Lenbur Fundazioak antolatutako ekitaldi sortari amaiera eman zion jaialdi honek. Korosti eta Sustraiak dantza taldeek, Legazpi Musika Bandak, Beñat Askargorta musikariak, Alaitasuna errondailak, Santikutz abesbatzak, Doinua musika eskolako ikasleek eta irakasleek, Suttanttakun txalapartariek, Agurtzane eta Jon Elustondo trikitilariek eta Legazpiko Erraldoi Konpartsak parte hartu zuten jaialdian, eta dantzaz eta musikaz bete zuten oholtza bihurtutako kirol kantxa eta ingurua. Publikoan 700 inguru pertsona elkartu ziren.
Jaialdiaren amaieran tarte bat hartu zuten antolatzaileek Txillidarekin lan egindako herritarrak omentzeko, eta oholtzara ateratzeko eskatuta, opari bana eta publikoaren txalo zaparrada jaso zuten. Ekitaldian Txillida familiaren hainbat ordezkari ere izan ziren.
