Ordiziako udaleku irekietarako izen-ematea irekiko da apirilaren 3an
Ekainaren 23tik uztailaren 18ra antolatu dituzte, 2014 eta 2020 urteen artean jaiotako haurrentzat. Astelehenetik ostiralera, 10:00etatik 13:00era izango dira. Izena emateko epea apirilaren 3tik 11ra bitartean da.
Ordizian aurten ere Udaleku Irekiak antolatu dituzte, ekainaren 23tik uztailaren 18ra bitartean, 2014 eta 2020 urteen artean jaiotako haurrentzat. Astelehenetik ostiralera, 10:00etatik 13:00era izango dira.
Apirilaren 3an irekiko da izena emateko epea, 11ra arte. Eskaera egiteko bi modu daude: aurrez aurre, Udaleko Arreta Bulegoan edo Gazteria Bulegoan; edota online, Ordiziako Udalaren egoitza elektronikoaren bitartez.
Plazak mugatuak dira, eta beharra izanez gero, zozketa egingo dute. Udalekuetan plaza lortu dutenen zerrenda maiatzaren 7tik aurrera argitaratuko dute Ordiziako Udalaren webgunean.
Udalekuetan plaza lortu dutenei Ordiziako Udalak dagokien kuota kobratuko die ekainean. Kuota arrunta 91 eurokoa da. Anai-arreba bat baino gehiago matrikulatuta dagoen kasuan, bigarrenetik aurrera 81 euro kobratuko dira. Hobaria eska dezakete beren urteko errenta mailak muga jakin batzuk gainditzen ez dituztela egiaztatzen duten bizikidetza-unitateek.
Kuota kobratu ondoren parte hartzaileren batek programan baja ematen badu, ez zaio ordaindutako dirua itzuliko, baldin eta justifikatutako pisuzko arrazoirik ez badago. Plazari uko egin nahi bazaio, eskaera orria aurkeztu beharko da Ordiziako Udaleko Arreta bulegoan edo udalaren egoitza elektronikoaren bidez.
Udalak jakinarazi duenez, taldeak osatzeko irizpideak ondorengoak dira: adina, sexua eta ikastetxeetako haurrak nahastea.
