Maizpideren udako kultur eskaintza hastear da
Ostiraletik irailaren 11ra arte iraungo du udako egitarauak. Musika, dantza, bertsoak eta antzezlanak nagusituko dira.
Duela bi urte egindako bertso-triki poteoetako bat, Lazkaon.Aimar Maiz Uda honetan ere, kulturaz eta aisialdiaz gozatzeko aukera paregabea eskainiko du Maizpidek Lazkaon. Herriko eragile desberdinek, barnetegiak eta udalak elkarlanean antolatu dute aurtengo egitarau zabala, eta herritar nahiz bisitariek udako hilabeteetan zehar eskaintza horrekin gozatu ahal izango dute.
Udako hiru hilabeteak barne hartuko dituen egitaraua argitaratu dute, eta ostiral honetan emango zaio hasiera ofiziala. Lehen ekitaldia Jotake Lazkaun kultur elkartearen bitartez izango da: talo-jana egingo dute arratsaldean, 20:00etan hasita, herriko plazan. Hasiera horren ostean, irailaren 11ra arte luzatuko dira ekintza-proposamenak, eta amaiera berezia izango du egitarauak iraileko garagardo azokako afariarekin.
Hamaika ekintza
Egitarauaren barruan, astez aste mota askotako jarduerak antolatu dituzte: musika emanaldiak, dantza ikuskizunak, antzerki saioak, bertso-afariak eta bestelako ikuskizunak eskainiko dira doan, kalean eta herriko hainbat gune esanguratsutan. Aurtengo agertoki nagusien artean daude Euskadi Enparantza, Maizpideko zinema eta Areria aretoa. Jarduera gehienak herriko plazan amaituko dira, baina Maizpidetik abiatuko dira, herrian barrena ibilbide labur bat eginez. Nabarmentzekoak diren ikuskizunen artean daude: Miñan antzezlana, Bentazaharreko Mutiko Alaiak taldearen kantu-jira ospetsua, edota Euskaldungak antzezlana.
Ekimenaren helburu nagusia da herritarrei aisialdiaz modu aberasgarrian gozatzeko aukera eskaintzea eta Maizpide herriko kultur dinamikan aktiboki txertatzea. Hala, barnetegian euskara ikasten ari direnek ere aukera izango dute euskarazko kultur esperientziak bizitzeko.
Zentzu horretan, uda honetan Lazkaora hurbiltzen diren guztiek aukera ederra izango dute euskal kulturaren kolore eta soinuez gozatzeko, giro atsegin eta parte-hartzailean.
