Etzi ospatuko da Beasaingo Odolkiaren 40. Lehiaketa
Odolkia izango da protagonista zapore eta tradizioaren festan. Epaimahaia Jakitea elkarteko kideek osatuko dute. Egun osoko egitaraua izango da larunbatekoa, artisauen azokarekin eta bestelako ekitaldiekin.
Odolki pintxoak prestatzen, iaz.Josune Zarandona Beasainen jada udazkenaren usaina ezin da ulertu odolkirik gabe. Herriko kaleetan, lurrin berezia nabaritzen da garai honetan: Beasaingo odolkiaren usaina da. Larunbat honetan, azaroaren 8an, Beasaingo Odolkiaren 40. Dastaketa-Lehiaketa egingo da, Beasaingo Odolkiaren Kofradiak antolatuta, eta aurten ere Gernika pasealekuan elkartuko dira ekoizle, zale eta dastatzaileak.
Ekitaldi honek lau hamarkada daramatza herriaren nortasun gastronomikoa ospatzen eta zabaltzen. Aurten, egitarau zabal eta parte-hartzailea izango du: goizean, 09:00etan Argizpiren argazki rallya abiatuko da, eta ordubete geroago bertako produktuen azoka zabalduko da, herriko eta inguruko ekoizleen eskaintza erakutsiz. 11:00etan, Ekaitz erraldoien eta buruhandien konpartsaren eguna hasiko da, kaleak kolorez eta musikaz betez, eta 11:30ean iritsiko da eguneko unerik gozoena, odolki dastaketa eta lehiaketa nagusia.
Aurten, lehiaketaren emaitza Jakitea elkarteko lau kidek osatutako epaimahaiak erabakiko du: Beasaingo Kattalin jatetxeko Arantxa Agirrezabalak, Ordiziako Martinez jatetxeko Xabier Martinezek, Donostiako Aratz jatetxeko Iker Zabaletak eta Larraulgo Zirka jatetxeko Lorena Arteagak. Odolkien zaporea, testura, usaina eta aurkezpena baloratuko dute, eta irabazlearen izena 13:00etan jakingo da.
Odolkiaren sekretuak
Kofradiako kideek azaldu dutenez, «odolkia ez da soilik jaki bat, historia eta identitatea» dira. «Belaunaldiz belaunaldi transmititu den jakintza da, eta gaur egun ere, artisau moduan egiten jarraitzen dugu, kalitatearen eta tradizioaren aldeko apustua eginez».
Beasaingo odolkia ez da edozein. Bere berezitasuna, tipula, porrua, txerri gantza, odola, gatza, eta espezien konbinazio orekatua dira. Bakoitzak bere neurriak eta trukoak gordetzen ditu, baina sekretu nagusia, adituek diotenez, kozinatzerako garaian ere badago. Denboran eta suaren kontrolean kontu handia izan behar dira: irakinaldi geldoan, odolkia lehertu gabe, barruko zaporea eta ehundura zainduz.
Festa giroa ere bai
Ez da harritzekoa, beraz, Beasaingo odolkia Euskal Herriko ezagunenetako bat izatea. Bere zaporeak, testura leunak eta tipula-porru nahasketa perfektuak ematen diote nortasuna. Baina odolkia artisau lana da eta ez daude bi berdin. Etxe bakoitzak bere errezeta, bere arima eta bere lurrin berezia dauka. Beasaingo lehiaketan, urte luzez Olano harategia izan da erreferente nagusietakoa eta herritarren artean ere izen berezia duena. Aurten, ikusteko dago nagusitasun hori berresten duen.
Lehiaketa-dastaketaren inguruan antolatutako egitarauak herriko bizitza kulturala eta gastronomikoa uztartzen ditu, eragile desberdinen bultzadaz. Goizeko azokak tokiko produktuen balioa erakutsiko du: haragiak, gaztak, barazkiak eta artisau produktuak izango dira ikusgai eta dastagai. Bestalde, erraldoiek eta buruhandiek giroa alaituko dute, eta arratsaldean familientzako antzerkia eta musikaz lagundutako kalejira izango dira protagonista.
Azken batean, Beasaingo odolkia ez da plater bat soilik; herriaren izaera eta nortasun kolektiboaren adierazpen bat da. Belaunaldiak lotzen dituen zaporea da, makina bat istorio, irribarre eta harrotasun pizten dituena.
Larunbatean, beraz, jaki honen inguruan elkartzeko gonbita dago: odolkia, Beasain eta tradizioa bat eginik, bizitasun eta zapore beteko egun batean.
