Urretxuko eta Zumarragako Musika Taldeen Mugimenduak jaialdia egingo du larunbat arratsaldean. Kalean eta gaztetxean eskainiko dituzte emanaldiak.
17:00etan hasiko dituzte ekintzak, kalejira batekin. Gaztetxetik abiatuko dira eta herritar guztiei egin diete bertan parte hartzeko deia. 18:30ean, berriz, Areizaga-Kalebarren plazako eskenatokira igoko dira lehen musika taldeak. Bigarren emanaldi sorta gaztetxean eskainiko dute, 20:30ean hasita.
Sei taldek hartuko dute parte aurtengo MuTaMu Egunean: Adiktos al Kaos, SRK-No Crew, Kortozirkuito, Kartal, XTRM eta Serie B. Hauen estiloak punketik Hip-Hopera doaz. Emanaldietarako sarrera doakoa izango da eta gaztetxeko kontzertuak KKinzona irratitik ere eskainiko dituzte.
