Legazpiko udaltzaingoak jakinarazi duenez, Lakiola inguruko zelaietan jendea sartu dela berriki, eta kalteak eragin dituztela zelaian. Paraje osoa babesteko hesiak jarrita daude lehendik ere, baina hala ere, motorrarekin sartu dira eta lurra arrastoz josi dutela adierazi dute. Horrelako ekintzek “errespetu falta ikaragarria erakusten dutela” esan dute udal gobernutik, eta ezinbestekoa dela “gertakari kaltegarri horien kopurua murriztea, eta ahal dela, desagerraraztea”. Ondorioz, gisa horretako “jarrera lotsagarri oro” salatu du Legazpiko Udalak.
